الجنية والكارنية علشان اللى برة مصر يخدو فكرة
تسميها ازمة تسميها ثقافة تسميها فساد مش هتفرق المهم ان الرشوة بقيت اساس الشغل و هى الباسورد لأي مشكلة او خدمة فى اى حتة فى البلد.
وده حوار بين نائر ونئير :-
نئير :حاجة تجنن مش معقول بقالي 3 ايام دايخ عشان اطلع بطاقة بدل فاقد.
نائر :انت اصلك مش بتعرف تسلك امورك . والله تلاقيك من الناس الى بيقفوا فى الطابور من الساعة 9 ويوصلو للشباك الساعة اتنين يدوبك يتقفل فى وشهم و يتقالهم فوتوا علينا بكرة بس بدري شوية.
نئير : انا كده فعلا .ومش عارف اعمل ايه .
نائر : شوف يا مسكين كل حاجة فى بلدنا بتخلص بالشخللة يعني لازم ترش رشة جريئة عشان تنجز نفسك .
نئير : ارش على مين .
نائر : على عم امين
نئير : مين عم امين ده .
نائر : عم امين ده موجود فى كل فى كل مصلحة ومكتب و مديرية .تلاقية فى المرور و البريد و المحكمة وحتى فى مصلحة السجون بس ممكن يطلع اسمه امين أو اسماعين مش هتفرق المهم ان هو ده اللى بيخلص الطابور فى لحظة و يكمل الختم الناقص
و بيزود الامضا اللى فاضلة و يوصل الورق لغاية الشباك فى رمشة عين او حرق سيجارتين او سحب نفسين .
نئير : انت متأكد من الوصفة بتاعة عم امين دى .
نائر : عيب جرب وهاتدعيلى .
نئير : طب وانا هاعرف عم امين ازاى .
نائر : انت بس تقف سرحان 3 ثواني وتايه ومش فاهم حاجة فى المكان وانت هتلاقى صوت ملائكي رقيق بيقولك :اي خدمة يا باشا . تعرف ان ده عم امين على طول .
انت عارف النكتة بتاعة العشرة جنية .
نئير : لا
نائر : واحد صاحبى كان راكب الميكرو باص مع ابن عمه السواق فوقفهم امين شرطة فى لجنة .وطلب منهم البطايق .المهم اخدو السواق تحري .
نئير : لية هو ماكانش معاه بطاقة
نائر : لا كان معاه بس ماكانش معاة عشرة جنية يديها لأمين الشرطة .انما صاحبى الحمد لله روح سليم .
نئير : عشان كان معاة بطاقة .
نائر : لا كان معاة العشرة جنية يامغفل ..
