يافلان ،،،انت بتكلم زميلتك ليه ؟ مجرد علاقة بريئة .
يافلانه،،،، بتكلمى زميلك على الشات ليه؟ مجرد علاقة بريئة.
والعلاقة البريئة تتطور إلى missed بريئة ، تتطور إلى message بريئة ،تتطور إلى مكالمة بريئة ، تتطور إلى مصايب بريئة .
كل حالات الزواج العرفى والإجهاض خرجت منين ؟
من الجامعة ياشباب
أكبر منطقة فيها إختلاط .
عشان كده لازم نحط أدام عنينا
أى علاقة بين ولد وبنت طريق من أوسع الطرق إلى النار.
الإختلاط أصبح فى دم المجتمع ، فى الدراسة وفى الدروس وفى الجامعة حتى وبعد التخرج !
إختلاط فى القرى ، إختلاط فى الأفراح ،
مين ده يابنتى ؟
ده ابن عمى
ومين ده يابنتى ؟
ده زميلى فى الدراسة .
ومين ده يابنتى ؟
ده صاحبى
ومين ده يابنتى ؟
ده زى أخويا .
ومين ده يابنتى؟
ده زى عمو ..
إزيك ياعمو ؟ عامل ايه يا عمو ؟ وتهزر مع عمو ؟ والله أعلم عمو بيفكر فى ايه " أيا ليت الشباب يعود يوماً"
زى واحد كان فى مدرسة مختلطة ، أم لبنت بتقول لواحد : إنت لو مطلعتش الرحلة دى أنا مش هطلع بنتى ، وهو يقول فى نفسه : حاضر ياطنط ، ياسلااااااااااااااااااااا ااااام أى خدمة تانى،( من غير مجهود!).
زى واحد معمر فى الكلية (بيسقط كتير ) وفى بنت لسه داخلة الكلية ، أبوها بيتصل عليه يقوله خلى بالك من بنتى ،عرفها الكلية ،..ياسلااااااااااااااااااا ام . أبوها بيتفح النار على بنته !
أنا واثق من بنتى!
طيب تعالى يا عم الواثق أما نفرجك على أرصفة الجامعة وعلى الكورنيش وعلى. وعلى ..وهم أعدين بيعملوا ايه مع بعض ونسمعك بيقولوا ايه لبعض !
معقوله ، حد ممكن يتصور دلوقتى من الشباب ، درس من غير اختلاط ، مصيف من غير اختلاط ، دورة كمبيوتر من غير اختلاط ، وياسلام بقه لما تلاقى امنية حياة كل شاب إنه يكون الموبايل بتعاه full memory نمر بنات .
لما تيجى تكلم واحد من الشباب يقولك : يا أخى بلاش كده بقه ، هو العقد النفسية بتاعتكم هطلعوها على الناس ، ياأخى هو كل البنات بالتفكير ال فى دماغكم ده وكل الولاد ذئاب بشرية ، ياأخى بلاش التعقيد ده ، ولما تيجى تتكلم ، يقولك إحنا بنتكلم أدام المجتمع وعلى المكشوف ،،، يعنى هو خلاص المجتمع بقه حجة على ربنا ، ما الخمرة الوقتى بقة هوم ديليفرى ،خلاص يبقى الخمرة حلال ..
بعض الشباب يقولك احنا بنعين بعض على الطاعة ، بتصحينى لصلاة الفجر ، بدعوها إلى الله ، بنتعاون على مرضات الله من خلال اللقاءات دى .
والأب يقول : يا بنت أنا هسيبك تعملى ال انتى عاوزاه بس متعمليش حاجه غلط ،،، يا سلااااااااااااام عامل زى واحد جاب صفيحة بنزين وكتب عليها ممنوع الإشتعال وحطها فى النار قال ايه مش هتولع !
سعارالإختلاط
تفتح التليفزيون تلاقى واحده طالعه لك ، تفتح النت تلاقى واحده طالعه لك ، تفتح التلاجة عشان تشرب حاجه ساقعه تلاقى صورة واحده طالعه لك على الحاجه الساقعه ، ناقص تفتح علبة التونة تلاقى واحده طالعه لك.
ايه رأيكوا فى الكلام ده ؟
