الحلقه السابعه من يوميات مشرف منحوس فى منتدى (الحلقه دى جامده)

مش هكتر عليكم عشان الحلقه دى جامده جدا

الحلقه السابعه



ميزو : بالنسبة لدور الأخ اسباى بتاع الإعلام .. إنت هاتبقى مهمتك في غاية الخطورة والحساسية ، إشرحله يا كاميلو

كاميلو : بص يا اسباى .. إنت هاتكون مرافق للبعثة الإعلامية المرافقة للسيد الرئيس وركز قوي على سمير رجب وراضيه على قد ما تقدر .. وكل دورك هايبقى منحصر في إنك تمسك كشاف وتقعد كل واحد في مكانه اللي هانتفق عليه

اسباى : يعني هاشتغل Placer يعني ؟

ميزو : شاطر أديك فهمت اهو

اسباى : حاضر ... خلص الكلام

ميزو : تاتا

افندم : أفندم

ميزو: إيه يا تاتا هو احنا في كانتين الجيش .. أقعد يا حبيبي ... بص يا تاتا إنت دورك هايكون مهم وحساس للغاية أيضاً ، إنت عارف إننا هانحبس بقيت الأعضاء الأفاضل في المنتدى وراء حاجز زجاجي مضاد للرصاص وكل دورهم هايكون إنهم يتفرجوا علينا سواء وإحنا بنلف على الأبواب أو وإحنا بناكل الاكل بتاع مكسيم يعني " متفرجون لا مواطنون " .. لذلك إنت هاتقف معاهم ورا الساتر وهاتاخدلك ساتر على جنب وكل دورك إنك هايبقى معاك يافطتين ...

تاتا : أيوه عارف .. يافطة مكتوب عليها للإيجار والتانية تمليك

كاميلو : إيجار إيه يا حاج تاتا ؟ .. إيه شغل السماسرة ده ؟ يا سيدي يافطة هايبقى مكتوب عليها تصفيق .. ترفعها لما أشاور لك بإيدي اليمين ... ويافطة مكتوب عليها هتاف ودي ترفعها لما أشاور بإيدي الشمال

درش : اما سمسم وضـى فهايمسكوا شوم ويقفوا جنب تاتا والعضو اللي مش هايتسجيب أو يسقف زي ماحنا عايزين .. يدولوه علطول

ضـى : نعم يا خويا ؟؟؟؟ بقى أنا مقطعه نفسي عشانكوا وعماله أزور في دول رسمية من إسلامستان لمباركستان لجمال آباد ومحشي ومش محشي .. وفي الاخر أقعد مع عامة الشعب .... طب والأكل ؟

درش : يا بنتي هاتكلى ما تخافيش .. هاعينلك علبتين من بتوع مكسيم تاخديهم معاكى وإنتى مروحه

ضـــى : درش لو حصلت أي حركات كده ولا كده .. انا ممكن اخسرك .. إلا الاكل .. انا هاموت وأشوف الأكل بتاع مكسيم ده عامل إزاي .. ده مستقبلي ومستقبل عيالي

ميزو : بالنسبة للأخت تاليا دورها هاينحصر في إنها تاخد الشباب الصغير اللي هما جيل الطلائع ويقفوا بره خالص وأول ما الريس ينزل من عربيته يرفعوا أعلام مصر الصغيرة ويروح قايلين النشيد الوطني لجمهورية مصر العربية

اسباى : انا بأقترح يا بوس نحفظهم برضوا كام طقطوقة من الحاجات الوطنية اللي عندنا .. زي كل بلاد الدنيا جميلة لكن أجمل من وطني لا ..... ومصر يا أول نور في الدنيا شق الظلام بالليل ... بس لو هايعكوا يبقى نتعاقد مع محمد زروت احسن

ميزو : اركن دلوقتى يا اسباى

شيمـــاء : إنتوا نسيتوا نقطة مهمة يا جماعة ..... السيدة الفاضلة سوزان مبارك .. مين اللي هايستقبلها مننا ؟

ميزو : انتى طبعا ومعاكي لفيف من بنات ومشرفات المنتدى كممثلين عن الجنس اللطيف هنا

كاميلو : انا بأقترح يبقى معاكي .. نهال وسمسم وتاليا وبنت اسكندريه

درش : إعتراض ... أولاً تاليا هاتصدع دماغ الست سوزان وتكلمها عن حروق المرأة والظلم والاضطهاد التي تتعرض له النساء في عصر مبارك والست سوزان ما بتحبش كده هي بتاعت مكتبات والتطعيم ضد شلل الاطفال والثلاثي ...
وبالنسبه لسمسم فمش هاتقدر تيجي في اليوم ده لأنها قالتلى إن عندها تدريب عملي في جنينة الحيوانات عشان تحضر ولادة مرات الأسد والحاجات دي مهمة وبتجيلهم في الامتحان
بنت اسكندريه بقى حكايتها حكاية وراحت لوزير الصحة من كام يوم في مكتبة وكانت هاتبطحه ، فرضنا دلوقت الراجل جه مع الريس وينت اسكندريه شافته .. مش بعيد تضربه برقبة قزازة أو تعمل لنا شوشرة قدام الريس

ميزو : يبقى ما فاضلناش غيرنهال وشيمـــاء

درش : أنا بأقترح أخدهم وانزل بيهم الموسكي أشتريلهم كام فستان على كام شراب فيليه وشنطة وجزمة شكل بعض عشان يبقى منظرهم حلو ... إيدك بقى يا ريس

ميزو : إيدي إيه ؟

درش: إيدك على 120 جنية عشان الحاجات دي .. أحنا داخلين على عيد والكحك بقى والكلام ده وبستلف ثمن أكلي

ميزو : طب خلي نهال وشيمـــاء يدفعوا وهابقى احاسبهم .. أو ياخدوا ببقية حسابهم إنذارات

كاميلو : عايزينك بقى يا شيمــــاء إنتي والبنات تسلوا الست سوزان وتبعدوا عن أي حاجة تزعلها .. وخلي تاليا تقعد تحكيلها شوية من مغامرتها في بلاد فارس وما وراء النهرين .. انا عارف الحريم بيحبوا الحكاوي دي قوي ، الرغى بقى ، وانا بأحذر سمسم إنها تتلامض او تتفلسف قدام الست .. عايز الليلة تعدي على خير وعايز روحكوا تبقى خفيفة

أحمد : إيه يا جدعان وانا وقعت من قعر القفة .. دوري فين مانا مشرف برضوا ...ولا أنا كمالة عدد وجايبيني عشان بتتفألوا بي ؟

ميزو : يا أخ أحمد ( مودى ) ، ( مازلت أرجو ان تغير إسمك اللي بيسببلي حساسيه مفرطة ) إنت حولك علامات إستفهام سوف يتم مناقشتها لاحقاً بعد ان نخلص من هذا الكابوس

درش : يبقى خلاص كده موافقة ... ربنا معاكوا يا ولاد وما تنسوش تستحموا كلكوا يوم الزيارة وكل واحد يروح على موضوع " ما هي كولونيتك المفضلة " ويختار له نوع من الحاجات اللي أفتر شيف على حسابي

اليــوم المـوعــــــود

هدير الموتوسيكلات الذى يسبق موكب الرئيس يدوى فى المنتدى.....تتبع الموتوسيكلات سيارات جيب محملة بجنود من الحرس الجمهورى وقوات الكوماندوز.....صوت سارينات سيارات الشرطة والأمن المركزى والحراسة يصم الأذان.....سيارات مرسيدس سوداء تتبع الواحدة الأخرى....سيارة السيد الرئيس وقرينته لا تزال غير معروفة لأن جميع السيارات المرسيدس يشبه بعضها البعض لدواعى أمنية.....يقف كل مشرف من المشرفين على باب من أبواب المنتدى وقد إرتدوا تى شيرتات موحدة عليها صورة ميزو كرمز لمزيكا تو داى وشورتات زرقاء وبيد كل واحد منهم بالونة ومقص

ميزو وكاميلو يقفون فى المقدمة فى إنتظار سيارة السيد الرئيس والتى لم يعرف بعد على أى المنتديات سوف تقف ...... تجرى الرياح بما لا تشتهى السفن....فقد وصل للمخابرات الحربية معلومات مفادها أنا المنتدى مليئة بالأعضاء المشاغبين وأعداء النظام الرئاسى فى الدولة....

ينتشر جنود الأمن المركزى بهراوتهم الغليظة ويضربون بعنف فى المشرفين ظانين أنهم أعضاء المنتدى وأنهم يضمرون السوء للرئيس ومرافقيه

اسباى : الله الله الله ..... إيه اللى بيحصل ده يابوص

ميزو : بوص إيه وسخام إيه دلوقتى ... أى ياعينى

يقع اسباى على الأرض والدماء تسيل من فمه على إثر شلوت من جندى هلف من جنود الأمن المركزى أصاب موقع حساس فى جسده .... يردد اسباى أغنية عبد الحليم حافظ ( إن مت ياأمى ماتبكيش...راح أموت علشان بلدى تعيش...إفرحى يا امه وزفينى...وفى يوم النصر افتكرينى )

كاميلو وقد أصابته ضربة شومة والدماء تغطى وجهه : بلادى بلادى بلادى لكى حبى وفؤادى... ...ياخوانا دى مزيكا تو داى مش الاخوان ولا حاجه ... إنتم أكيد غلطانين فى العنوان ... إحنا بنام ونصحى فى حب الأسرة المالكة ... وحياة توشكى ياريس لتخليهم يبطلوا ضرب ... خصيمك مترو الأنفاق ياشيخ خليهم يسيبونا....حلفتك بسيوة والفرافرة .... طب ب 6 اكتوبر...ثم يسقط على الأرض مغشياً عليه

تحتمى شيمـــاء خلف تاليا وبتقول : وحياة أبوكى يامدام سوزان تخليهم يوقفوا الضرب... مش علشان خاطرى...علشان خاطر الطفله دى

تقوم قوات الحرس الجمهورى باعتقال شيماء وتاليا وسمسم وتمشط المكان بحثاً عن ضـــى إلى أن تجدها مختبأه فى منتدى المطبخ فتقوم باعتقالها

يذهب قائد الحرس الجمهورى إلى سيارة السيد الرئيس مؤدياً التحية العسكرية ومعطياً إياه التمام بأن المنتدى قد أصبحت تحت سيطرة قواته وأن المكان قد أصبح أمناً

ينزل الرئيس وسوزان وجمال وسفوت ونظيف والمشير والشيخ طنطاوى ومرافقيهم إلى المنتدى وهى خالية من المشرفين

مبارك مخاطباً نظيف : أدى أخرة الحرية يا نظ نظ....العيال إفتكروا إن لحمنا مش مر وهاتك ياكتابة...العيال مخلوش حاجة ما كتبوش فيها...فساد...إحتكار سلطة...توريث...جراد...علاء والتوكيلات...حتى دينا الرقاصة الطاهرة ما سلمتش من لسانهم ... خلينا ندخل نشوف إيه اللى مكتوب هنا...يشير معاونوا الرئيس عليه بأن يبدأ بالمنتدى الاسلامى حتى تنقل الصحف ووكالات الأنباء نزعته الدينية التى تتسم بالإعتدال والفهم الصحيح للدين الإسلامى الحنيف بعيداً عن التطرف والإرهاب

يدخل مبارك إلى المنتدى الاسلامى ويقوم بأداء ركعتين شكراً لله ظناً منه أنه قد تخلص من الأعضاء المشاغبين ولا يدرى أن جميع الأعضاء محبوسين داخل منتدى السياسه وأن من تم إعتقالهم هم المشرفين....يؤم الصلاة الشيخ طنطاوى داعياً الله عز وجل أن ينصر صاحب الضربة الجوية التى فتحت باب الحرية وأن يخزى الأعضاء الفاسقين على إختلاف مذاهبهم ومشاربهم وأن ينصره عليهم