حريقة وصاحب المكان مش موجود توقعوا الفلاح المصرى الشهم عمل اية (حصلت بجد )

السلام عليكم

شوفوا بقى والله الموضوع دة حصل قدام عنيا ومن غير تريقة ممكن

كنت قاعد بلعب فيفا من كام يوم كدة المهم لقيت الميكرفونات فى الجوامع بتندة حريقة واسم الراجل الصراحة غريب عليا المهم على ما عرفت الراجل وعرفت انة جار واحد قريبى غيرت هدومى وطيرت على هناك الكلام دة فى اقل من خمس دقايق

رحت مش لقيت غير اكتر من ميت بنى ادم طفوا النار وصاحب المكان مش موجود بس كل حاجة خلصت والمكان كان ارض زراعية وفيه شوية مبانى عشوائية بيربوا فيها الحيوانات بتاعتهم يعنى مفيش مياة

الناس نزلت الترعة اللى مكنش فيها مياة وعمل حاجة زى حفرة وناس تجمع المياة وناس تنقل وناس تتطفى

هنا بقى سمعت خبر موسف الراجل جموستة النار مسكت فيها وكان لازم يدبحوها مش عاوز اقولكم تلاتة جزارين فى ثانية اتبرعوا ومنهم واحد كان عامل عملية خطيرة فى ظهرة ونستحايل علية فى اتنين غيرك يقول لاء دة واجب

المهم يعنى فى نص السلخ الخبر وصل لصاحب المكان لقيتة جاى مش مصدق مصدوم طيب اية اللى حصل وكدة بجد صعب عليا جدا المهم الناس عملت اللى عليها وهدنة دة كلة وكل الناس واقفة تواسية محدش مشى

بعد كدة جينا بقى هنعمل اية فى الجاموسة هنسيبها لصاحبها لحم والناس هتقول ياعم مش هنشترى دى تعبانة لاء لازم نلم لة حقها ( 9000) جنية
شوفوا اقنراحات كبار البلاد عندنا

1 نلف بالحمة كل كيس كيلو وكل بيت على الاقل يشيل كيلوا مساهمة لمساعدة الراجل

2 نوزعها على الناس اللى واقفة وكل واحد يدفع اللى فية النصيب

3 نحطها عند جزار ودة كان موجود معانا والناس تعرف بعضها ودة اللى تم وندهنا فى المكرفونات ربنا يعوض على فلان واللحمة اللى خرجت موجودة فى وسط البلد الكلام دة كان قبل العصر بشوية

بعد العشاء بسال اروح اشترى لقيت اللحمة خلصت وكنت بسال راجل كبير وفلاح قالى يابنى احنا رجالة مش عيال ودة اخونا ولام نساعدة بصراحة كنت سعيد جدا والله هو دة الفلاح بجد وبصراحة يومها عيط الست مرات الراجل اول ما شفت راس الجاموسة مفصولها عنها يعينى قعدت تعيط وتقول (دى حياتى دى ايدى ورجلية واصرت تبوسها وهى مدبوحة اة والله وفعلان باستها )

بس بجد لو فعلا دة المصرى فى كل وقت كنا زمنا احسن ناس فى الدنيا

اهم حاجة بقى ساعة صلاة العصر لمينا نفسنا وسيبنا الجزارين بس وخدنا الراجل معانا وطلعنا على الجامع بزمتكم الراجل على باليل بعد ما كل الناس وقفت جمبة ولم تمن حاجتة اينعم زعلان بس مش خففنا عنة كتير

عن أبى هريرة عن النبى (صلى الله عليه وسلم) قال "من نفّس عن مؤمن كربة من كرب الدنيا نفّس الله عنه كربة من كرب يوم القيامة ؛ ومن يسّر على معسر يسّر الله عليه فى الدنيا والآخرة ؛ ومن ستر مسلما ستره الله فى الدنيا والآخرة ، والله فى عون العبد ما كان العبد فى عون أخيه

وقال الله تعالى : "وافعلوا الخير لعلكم تفلحون"



المواقف دة معايا والله

سبحان الله
انا يمكن لاني من قريه
حاسس بالي بتقولو يا محمد
بجد اي مصري فلاح نجار رجل اعمال
من جواه طيب
بس محتاج جو حواليه يساعدو ع كده

والله كل الشعب المصرى طيبين جدا مش الفلاحين بس
بس يمكن فى ناس مش تعرف تخرج الطيبه دى او تبينها
واكيد الدنيا لسه فيها خير

اكيد الدنيا بخير يا محمد والطيبة فعلا موجودة فى الشعب المصرى وخصوصا الفلاح لانه فعلا بيعرف يقدر ده بيعرف فى الواجب كويس وبيعرف يعنى ايه حق الجار ده الست زعلت على الجاموسة وباستها فى اكتر من كده وفاااااء اكيد الجاموسة دى كانت بتساعدها فى حاجات كتير جداااااااااااااااااااا عوضهم على الله
وشكرا ليك يا محمد وشكرا لمجهودك وتسلم ايدك

لسه الدنيا بخييييير

هما دول المصريين فى كل زمان وفى كل مكان ما بيتغيروش ابدا من جواهم
يمكن الزمن يدارى طيبتهم لكن عمروا ما يقتلها جواهم

مصر جميلة اوى بناسها

هم المصريين كده طووول عمرهم شكرا قرموطى

يااااة الدنيا لسة فيها خير ووفاء جميل كدا
اجمل احساس فى الدنيا لما تحس اننا كلنا حاسين بعض وبنشارك بعض احزنا قبل افراحنا

الدنيا فيها خير

الغريبة إن فى بعض (الفلاحين) لمّا حد يقولهم يا (فلاحين) كأنهم بيشتموهم !!

وبيزعلوا جداً ... حاجه غريبة !

بجد فعلاً .. ياريت دلوقتى الناس تكون زى الفلاحين اللى إنت إتكلمت عنهم

.......