ومعايا بطاقة شخصية
نعمة وكفاية عليا
حد الله ما بينى وبينك
يا بطاقة يا إنتخابية
مش هختار بيها محافظ
ولا مخبر فى الداخلية
ولا حاكم هيورثها
99%
وحكومة دايرة تبرطع
ولا سائلة فى البشريه
ومادام مش هقدر أغير
شى اللاه ياديمقراطية
************
خللينى ملهى ف حالى
شقيان وبربى عيالى
وما دام همك فى اللقمة
تفضل مكسور طوالى
وقدرنا وللا سياسة
وللا دى ذنوب أعمالى
ماشى بلملم فى هدومى
وبخاف من صوتى العالى
وكفاية بدعى وحسبن
يمكن يخفوا إللى ف بالى
************
صابر والصبر جميل
ولا عندى غيره بديل
عامت غرقت وياها
وإن مالت لازم أميل
ماهى بلدى وفيها جدورى
مغروسة ف طمى النيل
حتى إن ظلمتنى وجارت
هطلع مجدع وأصيل
لا هشمت فيها أعادى
ولاخاين وللا عميل
بكرة هيفرجها المولى
وهغنى وأقول موواويل
************
