حصة جغرافيا
هنا النيل..
وهناك إسرائيل..
والقاهرة العاصمة
لكن الحزن
أهم المحاصيل..
وده الخطر
ودى ناس بتستنى المطر
وده الليل الطويل..
وبين صحرا ودلتا
وشبه جزيرة..
كل يوم بتضيع
حاجات كتيرة..
معدل النمو عالى
حسب كلام معالى الوزيرة..
لكن للأسف..
البلدفقيرة..
وما تسألش إزاى..؟
أهم المشروبات الشاى
وأهم الصناعات
البيرة..
عدد السكان..
ملايين كتير متفرقة
حزم.. حزم..
أهم المعالم
فى وش البلد
كل محلات الجزم..
وأهم الأحداث
مولد أبوحصيرة..
من مصادر الطاقة
الغاز اللى مش طبيعى
وأهم الموارد..
قانون الضرايب
لكن أهم المعادن
الناس الطيبين
وأهم الموانى
أغانى العاشقين
وأحلى المواسم
يوم ما الفرح يعدى ع القلب الحزين
وأعز الحبايب
بلادى الأسيرة..
على سلامه
