وعجبي علينا يا مصريين

سؤال بيسأله كل المصريين

ليه أحنا متأخرين

وكلنا للأسباب عارفين

بس مستهبلين

ووقتنا كله مضيعين

وإحنا علي الكافيهات قاعدين

وللشيشة والمعسل شاربين

والبنات والولاد لبعض معلقين

والرجالة والستات جوازات عرفي ضاربين

وعندنا مدارس وجامعات كتير بس مش متعلمين

وفاشلين

جاهلين

وجوامع وكنائس كتير بس مافيش دين

ونطلع من الصلاة نتخانق ونسب لبعض الدين

والمسلمون يكرهوا المسيحيين ويحرقوا البهائيين

والمسيحيين للاثنين مش طايقين

وعندنا ناس بتسال ندخل الحمام بالرجل الشمال ولا اليمين

ورجالة وستات بيحلفوا أنهم للجن متجوزين

ومخلفين

متخلفين

وعندنا نيل طويل بس عطشانين

وأرض خضراء مزرعة بس جعانين

والخضار والفاكهة الحمد لله متسرطنين

وفي أنفلونزا الطيور طلعنا علي العالم التالتين

ودفنا الخنازير حية والأنفلونزا مش لاقيين

حتي السمك مسمم جبناه من الفلبين

وبقينا خلاص نباتيين

ومش لاقيين



والريس بتاعنا عدي الثمانين

وحايركب ابنه عالبلد ويدلدل الرجلين

وعندنا رئيس وزراء طوله مترين

وإحنا ساكتين

وعلي بعض بس متفالحين

وعلي الغلبان بس نعمل جامدين

ولو عسكري المرور كلمنا ننزل نديله قلمين

لكن لو ضابط نقول له آمين

وندفع المخالفة حتي لو مش غلطانين



ونضحك في وش بعض وأول مانمشي نروح شاتمين

وكلنا نقول لبعض أنت عارف بتكلم مين





3/4 البلد بيتكلموا في الموبايل وهما شحاتين

والربع مساطيل ومحششين

بس سيبك أنت احنا ناس طيبين

وربنا ساترها وماشيه بدعاء الوالدين
مشيين بضهرنا ومش داريانين

وصدقني حانفضل كده علي طول وليوم الدين
وعجبى علينا يامصريين

تسلم ايدك الى كتبت وطبخت وتعبت ههههههههههههههههه

ربنا يوفقك فى الامتحانات

:-o:-o:-o:-o:-o:-o:-o