انا عاوز اكلمك عن حاجه بخصوص كدا ...؟؟
متنقلش مواضيع .. أنت مبدع بكفاية , حبة ثقة في نفسك ... والله لوفتحت موضوع جديد وركزت شوية , هتلاقي افكار كتيير اوي جديدة لانج تقدر تقدمها ..
والله انت مبدع .. وانا مش بحلف وخلاص .. انا بتكلم عن عقل ادهالوك ربنا مليان ابداع , وكلنا كدا .. ربنا مدينا خاتم سليمان في عقلنا .. بس مين بيحك الخاتم أكتر ؟؟؟
انا زيي زيك .. أحيانا ابقي مكسل أكتب .. او حاسس اني معنديش افكار اقدمها .. واحيانا اقول انا اخري هاكتب كلمتين .. بس أول ما ابدأ الاقيني مش عاوز أبطل كتابة ( رغاي انا عارف ) .. حط نفسك في الفعل .. هتشوف الفرق ..
اقولك ايه بس .. دانتا من الفكراوية .. يعني الدماغ الصاحية .. ابو الافكار كلها ..
طب تعمل أيه ؟؟
هنفترض انك مش لاقي حاجه تتكلم فيها .. تعمل أيه ؟؟
- شوف أيه بيحصل حواليك , اقرأ الاخبار , شوف برامج في التلفزيون , او اسمع للناس .. فكر حبه ... هتلاقي عندك تعليق طويل عريض عن الموضوع ...
- جرب تفتح اي موضوع مع حد من اصحابك او في البيت , هتلاقي نفسك بتقول كلام زي الفل .. وبتتناقش كتير .. هو دا اللي ممكن تكتبه , ناقشنا ياعم ..
- فضفض .. اكتب اللي حاسس بيه , رأيك في نفسك , في الدنيا , في الناس , في اصحابك .. اي حاجه .. مضايق , مبسوط , مخنوق , سعيد ... كلنا هنحس بيك ..
- استكشف ... لو بتكلم حد وعاوز تتعرف عليه , هتقوله مثلا سافرت قبل كدا , طب ايه هواياتك , بتحلم بايه .... الخ .. ماهي دي كلها وغيرها مواضيع تتعرف علينا بيها ..
- كتير اوي وانت راكب في عربية وسرحان , او رايح تنام دماغك تودي وتجيب وتفكر في حاجات كتير .. ومننا اللي بيفكر في حاجات فلسفيه غويطه ... شاركنا تفكيرك , قولنا وصلت لايه ؟؟
- قابلت حاجه متعرفهاش .. او شوفت حشرة غريبة ع الارض مثلا .. او اي حاجه غريبة صورها وشاركنا استغرابك ..
- أكتب عن اي حاجه تشغلك ... اكتب بتحب تاكل ايه , اسال الاكلة دي بتتعمل ازاي ..؟
- فوبيتك ايه ؟؟ كل واحد عنده فوبيا شكل واللي عنده كذا فوبيا .. كلمان عن فوبيتك وهات عنها معلومات .. انا مثلا عندي فوبيا البرص .. مبطقش ابص لمنظره .. وهعمل موضوع عن البرص ,, وهتشوفه قريب ...
- معقول مفيش حاجه في الدنيا متعرفهاش ؟ مفيش لغز محيرك .. عرفت سر الاطباق الطايرة , واوضة المعارف اللي تحت رجل ابو الهول اليمين , عرفت مين كسر انف ابو الهول ؟؟ متقوليش الارهابيين .. ازاي وصوره من ايام كتاب وصف مصر مفيهاش انف ولا يحزنون ( خليها انف بلاش نقول مناخير ) ..
- عاجبك ومش عاجبك .... اتكلم معانا وقولنا على اي حاجه حواليك مش عاجبك , او عاجبك وحابب تعرفنا عنها ...
- أسال استشير .. لا مش بتاع تنظيم الاسرة ... بس عندك مشكلة في اي حاجه كمبيوتر او في مذاكرتك او او او او اواوات كتير .. اسال هتلاقي الحل , كلنا هندور عليه معاك ..
- بترسم ؟ بتعمل اي موهبه يدوية ؟؟ صورها وشاركنا فرجنا على شغلك .. شاركنا اشعارك وقصصك .. متبخلش علينا بموهبتك أياً كانت ...
- كلمنا عن تخصصك .. خاصة لو بتحبه .. قولنا ليه دخلته , وايه اتعلمتو منه .. اشرح ياعم واحتمال كبير منمش منك وانت بتشرح ...
- بتلف في النت لقيت حاجه عجبتك , افهمها .. جمع معلومات عنها , وعيد صياغتها بطريقتك .. وكلمنا عنها باسلوبك ..
- سمعت عن خدمة جديدة مهمة , خبر حلو , حاجه ممكن نعملها , حاجه نجربها ... ازاي متقولناش ...
- عندك موهبه في حاجه ؟؟؟ طب ما تعلمنا ....
- بتحب القراية ؟؟ قريت كتاب وعجبك ؟؟ طب ما تكلمنا عنه وقولنا نجيبه منين ؟ ومين كتبه ... قرينا معاك ..
- عندك اخ صغير , او ابن اختك ظغنطوط وشقي وبتحبه , ارفع صوره وريهولنا .. او لو عندك صور لاماكن شوفتها وصورتها , حتي لو مش محترف تصوير .. فرجنا معاك على صندوق ذكرياتك ...
- بتفهم في الموبايلات في الكمبيوتر في اي حاجه .. طب ما تعلمنا مما علمك الله يا عمنا ...
- كلمنا عن كليتك .. جامعتك , مشاكلها , حلوها , وحشها , مرها , عسلها , اها ها ها ..
- لو قفلت معاك خالص .. ومش عاجبك المنتدي , خش وقلنا مالك , ايه مش عاجبك , ايه محتاج تطوير , اشتكي ,, متحطش في نفسك ليجيلك زغطه ...
- سافرت اي مكان في مصر او بره مصر .. طب ما تحكيلنا عن اللي شوفته هناك .,,. وسفرنا معاك ..
ووووووووووو لو قعدت اكتب لبكره الصبح في افكار تجيب بيها مواضيع جديدة مش هاخلص ..
انا راضي ذمتك ... بعد دا كله ...
أنت محتاج تنقل مواضيع ؟؟؟؟؟
