السلام عليكم ورحمة الله وبركاته
الكيميا وآه من الكيميا
احكي لكم حكايتي معاها يمكن الاقي حد عانى معاناتي
من ساعة ما تم فصل الكيميا عن باقي مواد العلوم وانا حسيت احساس مفاجئ انها طلاسم مستعصية الفهم والاستيعاب والهضم وكل أشكال اندماج المعلومات في الفص الجبهي
لدرجة اني فكرت ان ممكن يكون لي معمول عمل سفلي والعياذ بالله والعمل مدفون تحت جناح هدهد يتيم نفسه مسدودة عن الجواز - بس ماما نسفت لي الفكرة وأكدت لي ان المسألة لا تعدو كونها غباء والدليل ان ناس كتير فى نفس الكلية وبتنجح وتجيب تقدير شايفببن الناس بتعمل فى بعض اية الله يسامحهم
احاول قصارى جهدي مافيش فايدة وكمان المدرسة بتاعة تانية ثانوي كان عندها لازمة في الكلام بتقولها خلتني افقد بواقي قدرتي على التركيز في الكيميا واتفرغ تماما اني اعد كام مرة قالت اللازمة دي في الحصة وكنت باعمل لها احصائية شهرية ومنحنيات تقدم وتأخر في العدد وخلافه يعني
بس نجحت فى الثانوية ومش عارفة ازاي وصلت اني ادخل كلية كلها كيمياء بتاعة التفاعل بس ليها علاقة بالكيميا الانسانية ولقيت عندي قدرة اني افهم الكيميا الانسانية أكبر بمراحل من الكيميا بتاعة حمض الكبريتيك
بس فضل انطباعي عن الكيميا زي ما هو : حاجة تتضاف على حاجة تتطلع حاجة تالتة
ساعات بتطلع حاجة كويسة وساعات الكيميا بتاعة الحاجات المضافة مش بترتاح مع بعضها تطلع مفرقعات زي الصوديوم والماء مثلا
برضه لقيت الناس وتعاملها مع بعض نفس الحكاية
ناس كويسة + ناس كويسة برضه = النتيجة مش لازم تطلع حلوة
ساعات الكيميا بتاعتهم مش بتمشي مع بعضها
تلاقيهم مخنوقين من بعض ومش طايقين بعض
زي الزيت المغلي مثلا ماينفعش نقلي بطاطس من غيره
والميه ماينفعش نعيش من غيرها
لكن جرب تحط الاثنين على بعض وحتحصل مأساة غالبا حتنتهي على أحد الأسرة في عنبر الحروق بمستشفى قصر العيني
وفي نفس الوقت ساعات لما بتحط عنصر شرير مع عنصر طيب تلاقي نتيجة معقولة ومفيدة
زي الطحينة لوحدها ماتتاكلش لكن لو اتحطت مع العسل الاسود بتبقى حلوة جدا
فيه ناس برضه لو لوحدها تبقى ماسخة وناس تانية لو لوحدها تبقى حلاوتها زاعقة وتجزع بس لو بقوا اصدقاء تلاقيهم طبقوا نظرية الاواني المستطرقة وكل واحد اخد من التاني شوية صفات وبقوا حاجة تانية خالص غير اللي كانوا فيها
ساعات بقى ناس تبقى زي السكر وناس تبقى زي العسل بس لو حصل لهم تفاعل تلاقي العملية تجيب مرض السكر وساعات كمان السكر يجيب وراه ضغط عصبي وتلاقي السكر والعسل مش طايقين بعض ويمكن السكر يهرب من أي مكان العسل متواجد فيه
الغلطة هنا لا غلطة السكر والا العسل دي غلطة الكيميا - الاوزان الذرية مش متوائمة مع بعضها ويمكن كمان البعد البؤري للمحورية الانسانية في القاعدة الديناميكية مش شايف شغله كويس
حديثي عن الكيميا ممكن يطول وانا ماليش نفس ارغي
بس حد له تجارب في الكيميا يقدر يحكي معانا عليها ؟
انا عارفة ان ناس كتير عندهم معاناة من الكيمياء احكو لنا
وكل سنة وانتم طيبين
