يبقى انت اكيد.... اكيد فى مصر

اة و ألف آه من تلك الجملة...
يبقى أنت أكيد...أكيد في مصر

لو لقيت من كل بيت خارج مدرس خصوصى ..
يبقى أنت أكيد...أكيد في مصر

لو لقيت فى بلد سنه سادسة ابتدائى و سنه خامسة ابتدائى!...
يبقى أنت أكيد...أكيد في مصر
لو لقيت فى كل بيت واحد أو أتنين ماتوا من السرطان ...
يبقى أنت أكيد...أكيد في مصر

لو رحت التأمين الصحى و إدوك حديد و زرنيخ ...
يبقى أنت أكيد...أكيد في مصر
لو لقيت فى بلد البحث العلمى فيها تايه و لسه بيحاول يجد العلاقة بينه وبين المجتمع ...
يبقى أنت أكيد...أكيد في مصر

لو لقيت فى بلد ربع سكانها ساكننين فى عاصمتها ..
يبقى أنت أكيد...أكيد في مصر

لو لقيت فى بلد تعبيرات مثل "السحابة السودة" و "الشفافية" ...
يبقى أنت أكيد...أكيد في مصر

لو سمعت جملة "اللى نعرفه أحسن من اللى منعرفوش" ..
يبقى أنت أكيد...أكيد في مصر

لو رحت "دار الفؤاد" و جاتلك الفاتورة و نعشك فى طريقه "لدار الخلد" ...
يبقى أنت أكيد...أكيد في مصر

لو رحت تطلع مخالفات عربيتك و لاقتها غير صحيحة لأن بالفعل معندكش عربية ...
يبقى أنت أكيد...أكيد في مصر

لو لقيت عجوز و عجوزة ماشيين و معاهم سلم خشب لزوم طلوع الرصيف ...
يبقى أنت أكيد...أكيد في مصر

لو ركبت مترو الأنفاق و ملقتشى هوا و لا تكييف ...
يبقى أنت أكيد...أكيد في مصر

لو مزنوق و ملقتشى مراحيض عامة ...
يبقى أنت أكيد...أكيد في مصر

لو مرة لقيت رسوم الزبالة على فاتورة الكهربا و مرة تانية على فاتورة الغاز ...
يبقى أنت أكيد...أكيد في مصر

لو سمعت بودانك و شفت بعنيك رئيس نادى محترم بيشتم الكل بدون عقاب أو جزاء ...
يبقى أنت أكيد...أكيد في مصر

لو فتحت التليفزيون و شفت ظرف "البيت بيتك"...
يبقى أنت أكيد...أكيد في مصر

لو سألت واحد أو واحدة مين الريس فى كل الألفية الثالثة؟! و رد و قال بدون تفكير "مبارك" ...
يبقى أنت أكيد...أكيد في مصر

لو قرأت الصحف فى 2005 و فى 2016 عن توصيل الكهرباء للعشوائيات و لقيت نفس الكلام "التوصيل عملية مستمرة" ...
يبقى أنت أكيد...أكيد في مصر

لو قرأت الصحف فى 2005 و فى 2050 و لقيت نفس الكلام "الأصلاح السياسى و الإجتماعى عملية مستمرة" ...
يبقى أنت أكيد...أكيد في مصر

لو عرفت أن فنانة سابقة و زوجة لوزير داخلية سابق عمرها فوق التسعين مرشحة نفسها لمجلس الشعب ...
يبقى أنت أكيد...أكيد في مصر

لو رحت الباجور منوفية و سألت مين رئيس الجمهورية و ردوا وقالوا كمال الشاذلى ...
يبقى أنت أكيد...أكيد في مصر

لو رحت تنتخب و معاك بطاقة إنتخابية و ردوا و قالوا إنك متوفى ...
يبقى أنت أكيد...أكيد في مصر

لو سألت واحد أو واحدة ليه بالعربى هيه إسمها "مصر" و بالخواجاتى هيه إسمها "إيجبت"؟! و رد و قال معرفش! ...
يبقى أنت أكيد...أكيد في مصر

بجد موضوعك جميل بس مصر فيها حاجات حلوه كتير
و حتى احنا بنحب ساعات حاجات كتير وحشه فيها
مصر بتحس فيها بالكسل و روقان الدماغ بس ساعات بيكون لذيذ , المشكله مش مشكله بلد... المشكله مشكله اللى بيحكوموا هذه البلد
مصر هى امى ...نيلها هو دمى ...شمسها فى سمارى ..شكلها فى ملمحى ...حتى لونى امحى لون طينك يا مصر ...مصر مصر تحيا مصر :d:d:d:d

هههههههههههههههه
شكرا يا شريف على الموضوع الجميل
و يا BB على الرد الاجمل
هههههههههههههههههههه
و ربنا يهدينا و يهدي أولياء الامور
و بجد بنحبك يا مصر

علشان احنا بلد مميزه:p:p

hhhhhhhhhhhhhhhhhhhh
فعلا يبقى انت لازم تكون فى مصر
ميرسى يا سوبر

سانكيو bugs bunny ,magician ,essoo
على مروركم وردكم الجميل
ياريتكوا بتحبوا مصر زى
مابتحبوا تخشو على المنتدى
وتعرفوا قيمتها فى الاخر

لا اله الا الله
شكرا ياشريف على المجهود اللى بذلته ف الموضوع ده
بس انا مش عارف احنا ليه مصريين نشوه صورة بلدنا قدام الناس كدة
وبعدين ولنفرض ان بلدنا فيها حاجة وحشة
ماهى برضه ياجماعة فيها الحلو
وصدقونى الحلو اكتر من الوحش ومش لازم حد يقولنا على الحلو فى بلدنا لان دى حاجة لازم كل واحد فينا يحسها

ياريت قوى يااخوانا نسيبنا من الكلام ده

شكرا ياشريف وشكرا لكل الناس اللى ردت