عاوز تحب وتتحب طيب تعالى نشوف
النهاردة اصبح الغريب جدا ان الانسان يقول نفسى احب واتحب ... فعلا شىء غريب خصوصا فى هذه الايام الصعبة التى لا يجد فيها الانسان اى بارقة امل فى شىء كهذا ... وللاسف معظمنا فاهم الحب بطريقة غلط ... زى مثلا اى شاب علشان يوصل للكلام فى الجنس مع بنت يبدأيقول لها انا معجب بشخصيتك جدا ...وبعد كدة انا حاسس انى بحبك ... والتالى انا متأكد انى بحبك ومش قادر اعيش من غيرك ...وبعدين يبدا يقنعها بانه محتاج لها وان هو دة الحب وانه مستعد يتجوزها بس يااااااه الظروف صعبة دلوقت ...وهى طبعا خلاص وقعت فى الشبكة ولازم تقف جنبه بشهامة وبحب ... وهكذا يبتدى الملاوعة والتهرب ويبدا رحلة بحث عن اخرى .
اما البنت دى حكاية فيه بنات ممكن تحب لمجرد انها تخوض تجربة زى صديقة لها ... وبنت ممكن تحب بجد وتتحمل ظروف صعبة جدا مع حبيبها ... بس هو بيتسلى .... وبنت تانية عندها كبت اسرى وضغط عائلى ف بتحاول تخرج من الدايرة دى بعلاقة حتى وان كانت من النت زى البنات العرب والسعوديات
النهاردة اصبح مبدا الجواز ايضا عند الشاب له تعريف غريب جدا ونظرية يمكن تكون صح وممكن تكون غلط ... النظرية دى انا سمعتها من اكتر من شخص ...الشباب بيقول انا ممكن احب واحدة وامشى معاها بس لما احب اتجوز مش هتجوز واحدة مشيت معاها ...اصبحت العملية مجرد انه مشى معاها وبس ...طيب مش يمكن هى بتحبه حقيقى ودة جعلها تنتظره بالرغم من طول المدة .
وبعدين يعنى ايه مشى معاها ؟؟؟هو دة مصطلح بيدل على ايه اصلا؟؟
وفيه بنات بتدخل من سكة الحب وفاهمة كويس هى بتعمل ايه ... وياسلام بقى لو اخينا خام ومش فاهم ... طبعا هيقع على جذور رقبته ...
وطبعا الست فاهمة وامها فاهمة ولو حاول يخرج من الدايرة هيدفع دم قلبه ويتمرمط فى المحاكم ويخسر اللى وراه واللى قدامه ويبقى انسان محطم فيما بعد ...فاقد الثقة فى كل شىء حوله... وما عنده استعداد نفسى ولا مادى لاعادة التجربة ...
نفتكر بقى والشباب حالته كدة هيبقى فيه ثقة فى بنت أو شاب ؟؟؟ ممكن نختار من وسط كل العقليات دى الشخص اللى ممكن يبنى اسرة بجد؟؟؟
هل النهاردة كل الزيجات موفقة سواء كانت تقليدية او عن حب دة ان وجد؟؟؟
طيب سبب الفشل دة هو سوء الاختيار ؟؟؟
ام عدم قدرة على اتخاذ القرار ؟؟؟
ام اننا اصبح كل شىء فى حياتنا من غير هدف حتى بناء اسرة سليمة ...مجرد جواز وبس ؟؟
دة اهم اختيار فى حياتنا اصبحنا عاجزين عنه طيب باقى ايه تانى ؟؟؟؟
احنا اصبحنا بنستنزف مشاعرنا مع الزمن بشكل مش طبيعى ...
نشوف بقى الناس الرايقة اللى بتاخد الجواز علشان تقضى مصالحها مافيش مانع انهم يقولوا بحبك بس ايه اللى وراها ؟؟؟؟وراها مشروع هيتعمل ...صفقة تنعقد.... دول بقى صفوة القوم بيعرفوا يختاروا مين وامتى وازاى ...وبيقدروا يتعاملوا مع بعض حتى لو مثلوا الحب على بعض ... وطبعا دة للمصلحة العامة والخاصة ... امال ايه ناس بتفكر برضه .
وبجد هم دول اللى بينجحوا فى علاقاتهم لانها بيحكمها العقل والمصلحة والمنطق أما الحب ...ما اعتقدش وبيخلفوا رجال اعمال مية مية وسيدات مجتمع زى الفل ... مش حب بقى وكلام فاضى ... بلا خيبة ياعم ... هم لسة هيحبوا ويوجعوا دماغهم طيب ما يستفيدوا من الوقت اللى هيضيع فى الحب ويستغلوه فى صفقه جديدة .
حال غريب وناس اغرب .... حاجة تكسف
