قلمي ضميري وسيفي كلمتي
والحريه طريقي والحق غييتي
شقيت دروب الظلام بالأحلام
ونقشت اسم مصر على كل دنيتي
!!!
تلميذ لكني مش بغبغان
يحفظ يردد يدخل الأمتحان
يرمي الكلام ف ورقه والسلام
ينجح يصير مسئول يجبلنا سرطان
!!!
انا تلميذ ف مدرسة الحياه
اخد منها المفيد وارمي ما عداه
سريح بطوف في العالم واصيح
اهو ده العلام الصح يامحلاه
!!!
شاعر لكني مش لاقي سميعه
دي حتى نفسي قالتلي قطيعه
كل يوم تزودني هموم
كل يوم تزودني وجيعه
!!!
جاهل عاتبني إكمن شعري غم
تعاتب ماتعاتب أنا حر نفسي ياعم
طول ما أنا مجروح هكتب
ياالحبر يخلص ياالجروح تتلم
!!!
خرجت للدنيا شريد وحداني
بكيت...معرفش ايه بكاني
اكيد عرفت اني مصيري الموت
جيتها غريب وراجع غريب تاني
!!!
عيل صغير مش باين من الأرض
عايش طفولتي بالطول والعرض
اقول لنفسي ايمتى بقى هاكبر
اتاري الشقا على الكبار فرض
!!!
لما صرت شباب اتغريت
فتحت صدري للحياه وجريت
واما تعبت بصيت للسما وقلت
ياريت اقدر اطير ياريت
!!!
ابص لجدي واصحابه واقول
هل ياترى هاصبح واحد من دول
ولا هموت قبل اما اشيب وانحني
اكيد مش هفضل شباب على طول
!!!
ياابن ادم مالك كده مغرور
فرحان بنفسك وعايش اوي ف الدور
اصلك تراب وراح ترجع لأصلك
دي دايره وحتما عليك هتدور
!!!
مسكين ياطير الحق حر بس جريح
تشيلك الدنيا وتهبدك وتطوحك الريح
ازاي قادر تطير وجروحك كتير
قال: خايف أقع وفوقي الغربان تصيح
!!!
ف الكون داير أناطواف
لا يمكن أيأس أو أكل أو أخاف
صحيح أمل الخلاص ضعيف
لكنه موجود وبقوة بصيره يتشاف
!!!
عجبي على حر اليد واللسان
شايل ف قلبه حب يكفي جميع الأوطان
رافض يعيش ف سكوت ولو هيموت
يموت حر ولا انه يحيا جبان
!!!
مشيت ويا خيالي وسبحت ف الملكوت
شفت نور ربنا بين القلوب بيفوت
وسمعت صوت بينادي يابشر
هنا الفارق بين الحياه والموت
!!!
ماجربتش في ليله تسرح ويا القمر؟
وتسمع زقزقة الطيور ع الشجر؟
هوه اللي بين ضلوعك ايه؟
مش برضه قلب .. ولا حجر
!!!
بصيت للسما لقيت القمر هلال
قلت عجبي سبحان مغير الأحوال
بعد الكمال نقصت تاني إنما
حتى وانت هلال ياقمر كلك جمال
!!!
طلت عليا القمرايه بسحر كلامها
طربت فؤادي العليل بغناوي خلخالها
ألله على جمالها الغجري الفتان
إعصار حنان خطفني وشبكني بغرامها
!!!
روح ياقمر للي حكيتلك عنها
سلم عليها وبوسها على جبينها
وشوفها لو تعبانه هون عليها
وإمسح بضيك دمعات عيونها
!!!
إضحك ياقمر وريهم جمال ضحكتك
خليهم زيي يهيموا في محبتك
ألله على رسمتك وسط السواد
سبحان رب العباد نور ظلمتك
!!!
سألت القمر فين نصك التاني
ليه بتنقص شويه وشويه بتكمل تاني
قالي ياصاحبي بص حواليك
بصيت لقيت حبيب القلب جاني
!!!
مش بعاده ياقمر تغيب عني
ده أنا من المغربيه بشوقي مستني
زي كل ليله تجيني لكنك ماجتشي
إيه ياترى اللي مزعلك مني
؟؟؟'
ورجعت تاني ياقمرنا بشوق لينا
بدر مدور ومنور ظلام ليالينا
سبحان من صورك عليك طله
ساعات بتطربنا وساعات تبكينا
!!!
عصفور صغير فوق غصن الحياه
تسمع غناه قلبك يقول ألله
يفرد جناحه تتفرد جناين عبير
واما يطير روحك تطير وياه
!!!
عشقت فيكي غنوه ملفوفه بشالك
ألله عليكي سحرتي الدنيا بجمالك
بنظره منك تداوي القلب العليل
وتنطرب النفوس وتميل مع رنة خلخالك
!!!
ليه كل همك إنك تفارق أرضها
ليه كل صبح وليل بتلعن إسمها
اديتها ايه في حياتك .. شوية عويل
يبقى في شرع مين تاخد منها
!!!
أنا إبن خير أرضها وأصالة حواريها
أنا عزمها وتروس مكنها وسواقيها
أنا خطاويها وحلمها المطحون شقا
إنت بقى تطلع إبن فيها
!!!
انا نبت طينك يامصر أنا الأساس
لا انا ديوس ولا خاين ولا نخاس
أنا اللي في محنتك منك قريب
أنا الغريب فيكي أنا المنداس
!!!
ساعة البلا بكون على راس الطابور
دمي تمن نصرك ولحمي جسر العبور
وساعة الرخا بكون في أخر الديل
مهمش ذليل ممنوع من الظهور
!!!
يلوموا ما يلوموا برضه بحبها
ومايهمنيش هاخد إيه منها
ومهما تزيد عليا الهموم
برضه واجب عليا أشيل همها
!!!
لو نفسك عنيده لازم تعند معاها
إضحك لو الهموم بالكوم ساكناها
وإبكي لو فرحت تلاقيها خضعت لعقلك
وسايرت هواك بدال ما تساير هواها
!!!
غلطان ياللي تحزن وتشيل الهموم
علشان حاجات تافهه ملهاش لزوم
بتجري في مكانك ومضيع سنينك
ونسيت وطنك ودينك لما بقيت معدوم
!!!
ياللي بتلعن قسمتك مسا وصباح
مش هيفيدك ياجدع كتر النواح
بص حواليك هتشوف الحياه أحلى
حرر خيالك هتلاقي الكون براح
!!!
شايل هموم الدنيا جواك ومخنوق
مسروق من سنينك ومزنوق ف الشقوق
فوق يابني ربك مش ناسيك
إرفعلو إيديك تحلى الحياه وتروق
!!!
جاهل يابن آدم وطبعك عجيب
بتحب المخادع وتميل للغريب
وتصدق ضحكه صفرا وشها كداب
وتكدب بسمه حلوه رسمهالك حبيب
!!!
على كل شكل ولون هتقابل وشوش
ملايكه وأبالسه وطيبين ووحوش
وناس تضحكلك وهيا كارهه صحبتك
وف شدتك تغني عليك بلحن مغشوش
!!!
إمتى نفوق بقى والحق يجمعنا
وكلامنا يتوزن ويبقى له معنى
خلاص زهقنا من عيشة الهامش
لازم يشوفنا الكون ويسمعنا
!!!
مع إني شاب لكني عجوز تفكير
لفيت قليل لكني شفت كتير
أشكال وألوان وناس طباعها تحير
وشوشها بتتغير علشان مصالحها تسير
!!!
بصيت للقبور لقيت ناسها نيام
قلت عجبي سبحان من له الدوام
هنا المصير مفيش دونه نصير
لكن مين راح يسمع لي كلام
!!!
بتشكي لمين علتك ياإنسان
معلول أنا زيك وأكتر كمان
جبان محمي بجبان
منين يحس بأمان
تايه بيسأل تايه
منين يلاقي عنوان
!!!
خدني الهوا لمارينا رأيت أهوال
وبلاوي لا تتكتب ولا تتقال
رأيت بنات لابسين لحمهم وجنبهم
رجاله بقرون على هيئة بغال
!!!
ياللي قطفت زهرة الربيع بالغصب
ونهشت براءتها وقتلت فيها الحب
منك برئ الكون ياملعون
منك يستعيذ إبليس ويشمئز الكلب
!!!
قلمي ياناصح غيري بالضحك والغنا
وانت اللي متعبي مش حبر لأ ضنا
اما انت طبعك غريب ياجدع
مش بيك اولى تنصحني انا
