عجبى

أنا قلت كلمة وكان لها معنيين
كما بطن واحدة وتوأمين زي وشّين
لو دنيا شر.. التوأم الخير يموت
لو دنيا خير.. الشر ح يعيش منين
عجبي
*******
أنا اللي بالأمر المحال اغتوى
شفت القمر نطيت لفوق في الهوا
طلته ما طلتوش إيه انا يهمني
و ليه.. ما دام بالنشوة قلبي ارتوى
عجبي
*******
بره الإزاز كان غيم وأمطار وبرق
ما يهمنيش – أنا قلت – ولا عندي فرق
غيرت رأيي بعد ساعة زمان
وكنت في الشارع.. وفي الجزمة خرق
عجبي
*******
عيني رأت مولود على كتف أمه
يصرخ تهنن فيه.. يصرخ تضمه
يصرخ تقول يا بني ما تنطق كلام
ده اللي ما يتكلمش يكتر همّه
عجبي
*******
يا عندليب ماتخافش من غنوتك
قول شكوتك واحكي على بلوتك
الغنوه مش ح تموّتك إنما
كتم الغُنا هو اللي ح يموّتك
عجبي
*******
ياللي بتبحث عن إله تعبده
بحث الغريق عن أي شئ ينجده
الله جميل وعليم ورحمن رحيم
أجمل صفاته.. وانت راح توجده
عجبي
*******
حقرا وفوق كوكب حقير محتقر
في الكون تكون دنياكو إيه يا بقر
رملايه من صحرا؟ لكين إيش تقول
و الكون بحاله جوه عقل البشر
عجبي
*******
ياللي في حماه الشمس تلقي الملاذ
و ألف بكره وبكره.. في ضلوعه لاذ
مين أنت؟ مارد؟ رب؟ قال لأ ده بس
انا اللي باروي القمح واسقي الفولاذ
عجبي
*******
غسل المسيح قدمك يا حافي القدم
طوبي لمن كانوا عشانك خدم
صنعت لك نعليك أنا يا أخي
مستني إيه؟.. ما تقوم تدوس العدم
عجبي
*******
لا تجبر الانسان ولا تخيّره
يكفيه ما فيه من عقل بيحيّره
اللي النهارده بيطلبه ويشتهيه
هو اللي بكره ح يشتهي يغيّره
عجبي

ياللي بتبحث عن إله تعبده
بحث الغريق عن أي شئ ينجده
الله جميل وعليم ورحمن رحيم
أجمل صفاته.. وانت راح توجده

تسلم ايديك يامحمد على الموضوع الجميل ده

تسلم ايد سيادتك يا سيادة اللوا
جميلة الرباعيات

شكرا على ردكم الجميل

:مر::مر: