من رباعيات صلاح جاهين
ليه ياحبيبى مابينا دايما سفر
ده البعد ذنب كبير لايغتفر
ليه ياحبيبتى مابينا دايما بحور
أعدى بحر الاقى غيره أتحفر
______________________
أعرف عيون هى الجمال والحسن
وأعرف عيون تأخد القلوب بالحضن
وعيون مخيفة وقاسية وعيون كتير
باحس فيهم كلهم بالحزن .. وعجبى
______________________
فى يوم صحيت شاعر براحة وصفا
الهم زال والحزن راح وأختفى
خدنى العجب وسألت روحى سؤال
أنا مت؟؟؟ ولا وصلت للفسلفة
_____________________
نظرت فوق النجوم وأنا ساير
رجليا عترت فى الحفر والحجاير
بقيت أقول وانا ع التراب ::ياسلام
مش بس عبره أخذت لكن عباير
_____________________
يانجم ....نورك ليه كده بيرتجف؟
هو أنت قنديل زيت؟ أو تختلف
أنانجم عالى...بس عالى قوى
وكل ماانظر تحت أخاف أنحدف
_____________________
شاف الطبيب جرحى وصف له الامل
وعطانى منه مقام يادوب ماأندمل
مجروح جديد ياطبيب وجرحى لهيب
ودواك فرغ منى وايه العمل ... وعجبى
______________________
