مادة الcircuit هندسة الزقازيق - مشهد من ليلة امتحان
النهاردة كان عليا سيركت , مادة الدكتور مهدي العريني
غرباوي هندسة , فاهمة يا سنو:p و انتي كمان يا ندى:p
انا دخلت الامتحان
استلمت الورقة الاولانية , و كان فيها تلات اسئلة , استنيت التلات اسئلة التانين , ببص في ظهر الورقة بالصدفة لقيت اخر جزئية في السؤال التالت و بعديها كلمة good luck/:) استغربت قوي/:)
سألت المعيد , هو فين الورقة التانية , قالي مفيش ورقة تانية , هي واحدة بس .
انبسطت قوي , و لكن ما خفي كان اعظم:p
نرجع فلاش باك لقبل الامتحان بتسع ساعات
يعني الساعة 12 صباحا امبارح
كنت تعبان و عايز انام , و في نفس الوقت قلقان قوي , المادة بايخة و دكتور زي الفل , و ورق كتير بالعبيط , و معلومات متضاربة , يعني كل المقومات اللي تخلي الواحد يشيل المادة , و انا مش طالبة معايا شيل مواد الترم ده
من الساعة 12 لحد الساعة 2 جثة هامدة على السرير بس مفيش نوم , مرارتي اتفقعت , قلت اقوم اشوف الدنيا فيها ايه.
فتحت شاشة الكمبيوتر لانه مبيتقفلش , كبيره الشاشة بس. و فتحت المنتدى , و عملت كام مصيبة كده على النت و على الماسنجر و مواقع اخرى , ابويا جه الساعة 3 صباحا , لاقاني على الكمبيوتر , طبعا عمل فيلم تركي لانه فاكر اني كل ده على الكمبيوتر , و انا ولا انا هنا .
و انا مبشرحش لحد , اللي هو شايفه شايفه , مش مشكلة , انا مش فايق , مش لسه هشرح و هبرر , كله بيطلع في الغسيل.
المهم بعد ما بابا كمل على بقيت المرارة اللي عندي , قلت مفيش غير المنوم الطبيعي , الكتاب , مسكت حبيبي الكتاب الساعة 3 و نص , كنت في سابع نومة الساعة 4
المشكلة اني كنت متفق مع واحد زميلي هجيبله ورق مهم الساعة 7.5 لحد 8 في الكلية .
فكنت لازم اصحى الساعة 6
بالعافية صحيت الساعة 6.15 , و برده مقدرتش اقاوم , فتحت شاشة الكمبيوتر و شوفت ايه اللي حصل في الساعتين اللي نمتهم , ابويا شافني على المحروق , " يعني انت مفيش غير ابن ال ...( متروكة لخيال القارئ) , يحرق ( متروكة لخيال القارئ) اللي جابهولك على اليوم اللي جه فيه "
انا مش فايق اصلا , و لا شايف قدامي , انا نايم ساعتين و ورايا اوسخ امتحان في الترم .
قلت اقصر , قفلت الشاشة تاني , و روحت قفلت الباب قال يعني هلبس , و بعدين كملت اللي بعمله على الكمبيوتر , و بعدين قمت غيرت .
الصراحة مكنش معايا فلوس كفاية , فعملت عملية هاكينج على محفظة ماما , و اخدت منها عشرة جنيه :d و بعد ما اخدتها قلتلها ان انا اخدت فلوس , حطيتها قدام الامر الواقعO:-)
روحت موقف مشتول السوق الساعة 7 و قلت كويس , هوصل على الساعة 8 في ميعاد صاحبي و قلت مية مية , و قدام على الاقل ساعة اراجع فيها نص المنهج اللي لسه مخلصش حاجة مية مية
من الساعة 7 لحد الساعة 8.45 واقف في موقف المحروقة مشتول السوق , حاجة تفقع المرارة يعني , و انا لما بتخنق في اول اليوم بفضل متضايق طول اليوم .
وصلت الكلية الساعة 9.20 فاضل عشر دقايق , ملحقتش اعمل اي حاجة , يدوبك طلعت و قعدت واستلمت الورقة و نرجع بقى بعد ما طلعت ورقة واحدة .
و بما اني عارف اللي هيحصل لو قريت الاسئلة مقريتش و حليت على طول.
السؤال الاول الجزئية b الاقي الدكتور جايبلي السؤال من مادة القياسات الترم الاول:d
انا شايلها اصلاااااااااااااااااااااا ااااااااااااااااااااا
يا فرحتي , حبيبي مهدي العريني ده , عثثثثثثثثثثثل
الفت , و عيش حياتك
بعد التاني بدأت اعراض قلة النوم تشتغل يا معلم.
زغللة , وجع في الظهر , قلة تركيز , خفت ليحصل زي يوم الالكترونية , غمضت عينيا ثانية و فتحتها تاني و كملت , و كل ما كنت اتعب اريح كام ثانية و اكمل.
الحق يتقال , انا الفت سؤالين , كل واحد فيها من 8 درجات , و الباقي حليته , بس طبعا الله اعلم بخصوص النواتج.
كده كده انا مبسوط باللي عملته النهاردة , و لاني اتدربت على الصعب الامتحان النهاردة كان متوسط بس انا حليته كويس
و ربنا يهديك كده يا دكتور مهدي وترفعلي الماشين كمان
و يا سلام بقى لو القياسات كمان تترفع
و اعدي الالكترونية بتاعت السنة اللي فاتت همتحنها يوم السبت و اعدي الترم ده صافي
و السنة الجاية اخش حاسبات
و اطلع معيد في كلية هندسة الزقازيق
طبعا بابا اول ما قلتله موضوع اني هبقى معيد ده , مش لازم اقول متروكة لخيال القارئ , انتوا متخيلين لوحدكم:p
يا الله بقى
ربنا يوفق باقي الممتحنين
و اجدع سلام لكل عائلة فكك
سلاموعليكم
