""دوخة محبّه ""

يا زاير الليل وش جابك على بالي
يعني ملزّم بنفس الموعد تجيني
*
مايكفي اللي تشوفه من تعب حالي
حرام ماصار لي للحين يكفيني
*
يكفيني دموع هلّت فوق الأطلالي
سحاب شوقٍ نزل في راحة يديني
*
أيوا الله أذكر ولاني ناسي الغالي
معقوله انسى وانا طاريه يعميني
*
لا صرت جالس مع العالم تهيّالي
واصد اشوفه مقابلني يراعيني
*
ثم ابتسم له وكنّي جالس لحالي
يالله برحمتك ياربي تعافيني
*
مخنوق الأنفاس بين بعاد ووصالي
والشوق دربٍ مع الأيام ينهيني
*
تعبان شوق ووله وجروح وآمالي
والموت بيدين من يقدر يداويني
*
مظلوم يطلب عدالة جاهلٍ سالي
يقول ما أقدر ولكن لا تخليني
*
دوخة محبه ياعرب طعمها حالي
الضعف فيها على الدنيا يقويني
*

جميل جميل