لو كات البسمة دليل تجريد الهم
كانت كل هموم العالم دابت زى الملح
معيار الكون علشان ما يكون مظبوط
كان لازم يبقى هناك الخير والشر
وانت صاعد للسما قاصد براح
ارسم وشوش الناس دهب على فضه
وابعتها ويا القمر أول ما تطلع فوق
بس أوعى ترسم ليل
متكسر الجناحات
حتى الخروج من عتمة النهايات
لبداية الشقشقة
عايزه العناد و الصبر
زى الأراضي البور ما تمسها الرحمة
بالقوة و الاحتمال
ينفك عنها الكرب
تلقاها سايقة الخير ...
متهيأه للحب
أيام عبط ...
نسكنها ... تسقينا الدموع
نسكن ربوع جد الجدود
نقطاية لبداية الخلود
ونحِن للنهر الأمين
نغسل هموم يومنا .. نقوم
نبني اللي فاضل من سنين
فايته الزمن للعنكبوت
لكن ايدين الأخطبوط
كانت طوفان بيهزنا
ويلفنا بتوب المهانه ف بعضنا
كان العنب حلم الجميع
وبنستنى
آخر مواسم للحصاد
نمنا وما درينا
فوتنا روحنا
بين إيدين
متلجمة
وعشان من تانى نقدر ندوق
طعم العنب
لازم نفوق
لازم نولع فى استهبالنا
100 مليون حزمة حطب
*****************
أحلى سلام
