الكلاب....عبد الرحمن الابنودي

الكلاب تسكت وتنبح
الكلاب تقفل وتفتح
والكلاب تمنع وتسمح
والكلاب تخسر وتربح
نبحها في الليل غريب
صمتها دايما مريب
عالبيبان واقفه مناوبه
دشمه لا تشبع متاوبه
لو اكلت اللقمه تنبح
لو رميت اللقمه تنبح
لما تتاوب مبداريش نيابها
لما نسكت تبقى هاديه
لما نتكلم تعبر في وضوح
علمتنا الاكتئاب ...الكلاب
طالعه نازله كالمكوك
بس يزعجها ادان الفجر وصياح الديوك
عارفه سكه المناطق الجديده
والحوانيت والاوتيلات الجديده
تشرب القهوه وهي قاعده بتفلي الجريده
تعرف العمله اذا قلقانه ولا مطمئنه
متقابلهاش الا ع باب النوادي والبنوك
في الصور تظهر وتوضح كل مشبعنا غياب
لما بتعدي نوسع
لو نناغشها تسرسع
الكلاب تنبح ولكن مش بتسمع
اي كلمه لو نقولها تتنفض...ترفع ديولها
قد مضيق الحياهقدام عيونا ....قد ما قدامها توسع
لما تشوفنا تبصبص
في الحوانيت الرخيصه تحتقرنا
عارفه احوال الجميع من غير سؤال
من غير متفحص ليها نظره لاتخيب
نبحها دايما غريب
صمتها قاسي ومريب
كل مناصحها نلاقيها انصح
كل ما نسكت نلاقي سكوتها افصح
في العراك تعرف تحارب
في البورص تعرف تضارب
تمشي في الاسواق بتتمايل.....وتغلب اي شارب
قاعده ع اعلى المكاتب
نايمه ع اغلى المراتب
دخلها عمرو ماينقص
لو نجحت تقف في ريحك
لو تموت عارفه ضريحك
لو وقفتلها تزيحك
الله غالب الله واخد الله جايب
واللي جاي هو اللي انأنح
موتوا حلم الاحبه والصحاب
الكلاب
لو تعضك اوعى تحدفها بطوبه
القوانين للعقوبه
والكلاب هما الخصوبه
ليها اطفال عمي ...بكره يفتحوا وينبحوا
من غير صعوبه
يخجوا كوفان ع قلب المدينه
اللي ملناش حاجه فيها واللي ملهاش حاجه فينا
يخرجوا طوفان يحروا برد طوبه
واحنا ما في اليد حاجه
سذج اخر سذاجه
مكتشفناش انها نبح وعض
كان بقالنا قصور ومال ياما وارض
كان زمانا بننجحوا وكان زمانا بنسكتوا وبننبحوا
وبتقفلو وبتفتحوا
زي الكلاب

عبد الرحمن الابنودي