هو صحيح الرجالة ماتوا ف 73؟

هو صحيح ولا ايييييييييييييييييييييييي يي ييييييييية



المشهد الأول:

المكان: أتوبيس مزدحم جدا..
الزمان: الساعة 8 صباحا
سيدة حامل تحاول إيجاد مساحة فارغة داخل الأتوبيس المكتظّ.
السيدة الحامل: "لو سمحت وسّع شوية مش عارفة أقف"
شاب فنكي: "جرى إيه يا ست إنتي؟؟ ما إنت شايفة الدنيا زحمة"..
صمت طويل.. شخص يقف فجأة استعداداً للنزول، والشاب قفز بسرعة ليجلس مكانه دون أدنى اهتمام بالسيدة الحامل..
الشاب الفنكي: "الدنيا زحمة أوي.. مش معقول واقف من الصبح ما حدش قام علشان أقعد.. الناس جرى لها إيه؟؟" ويحاول أن ينام مسندا رأسه على ظهر المقعد حتى وقت النزول.
عجوز يجلس في الخلف ويراقب المشهد من البداية: في نظرة استنكار وغضب يرد: "تعالي يا بنتي اقعدي مكاني.. أنا مش عارف الدنيا جرى فيها إيه! الظاهر إن الرجالة ماتوا في 73".
يقف العجوز مستندا على ذراع الكرسي ويده الثانية على عكاز قديم وإلى أن يغادر الأتوبيس وهو مستنكر من الحالة التي وصل لها رجال مصر، وكيف أنهم بحق ماتوا في 73 كما نقول.

المشهد الثاني:
المكان: شارع جانبي في وسط البلد
الزمان: يوم 6 أكتوبر - الساعة 12 ظهرا
خناقة في وسط الشارع، والجميع يمر عليها ويكتفي بالمشاهدة من بعيد..
عصام: "ما تيجي يا أخي نشوف الناس دي ونفضّ الخناقة.. كده هيموّتوا بعض وما حدش سائل!!"
فتحي: "باقول لك إيه، بلا خناقة بلا بتاع.. خليهم ياكلوا بعض، ولو ماتوا يبقى أحسن أهو نرتاح منهم.. ما ينوب المخلص إلا تقطيع هدومه.. وبعدين كده هنتأخر على ميعاد الواد عمرو، مستنينا في شارع سليمان باشا بالمسائل.. يلا بقى"..

صوت شادية في خلفية المشهد من كشك صغير:
ما شافش الرجال السمر الشداد فوق كل المحن
ولا شاف العناد في عيون الولاد وتحدي الزمن
ولا شاف إصرار في عيون البشر بيقول أحرار ولازم ننتصر
أصله ما عدّاش على مصر.. يا حبيبتي يا مصر

وهنا ينطلق صوت صاحب المحل العجوز: "اقفل يا واد الراديو ده، قال ما شافش الرجال قال.. تيجي تشوف دلوقتي، الكلام ده كان زمان.. فعلا الرجالة ماتوا في 73 ".

عرفت إحنا بنتكلم على إيه ولا لسه؟؟ على تلك العبارة التي نرددها كل يوم، وعقب كل مشهد مؤسف تنهار فيه قيمة أو مبدأ أو تموت فيه الأخلاق: "الرجالة ماتوا في الحرب" جملة نرددها بمنتهى التلقائية وتحمل بين حروفها ذلك المعنى الذي عجزنا أن نسميه لسنواتٍ، ويسميه المثقفون انهياراً أخلاقياً؛ ولكن الناس العاديين اختصروا ذلك كله في تلك الجملة التي تؤكد دفن أخلاقيات المصريين مع شهدائها في حرب أكتوبر 1973.

وبعيداً عن كون حرب أكتوبر نفسها بالنسبة لكثير من الشباب مجرد ذكرى سطر ونص في كتب التاريخ، أو اسم لكوبري "زحمة أوي"، أو اسم لمدينة جامدة بس ناقصها مترو، أو على حد تعبير شخص عادي سئل سؤالاً بسيطاً: "بماذا يذكرك 6 أكتوبر؟"
"ده عيد ميلادي، بيفكرني بماما وبابا"..

يعني أصبح ذكرى بعيدة مجوّفة لَدَينا، وخالية من معنى، تتذكره وسائل الإعلام باستضافة رموز الحرب الذين مازالوا على قيد الحياة، وأفلام "الرصاصة لاتزال في جيبي"، و"أغنية على الممر" و"أيام السادات" لمن لايزالون يشاهدون القنوات الأرضية.. لكن ماذا عن الأخلاقيات.. عنا إحنا شباب مصر بعد 36 سنة من حرب أكتوبر؟!

السؤال لك .. والإجابة لديك أيضا.. نحن الآن ومنذ أربعة عقود تقريبا ليس لدينا حرب مع عدو ظاهر؛ بل ما يقال لنا: إننا في سلام مع العدو الأساسي، ولا أعداء لدينا غير إسرائيل.. يعني من المفترض أن حالة الرخاء تنعكس على أخلاقياتنا وليس العكس.. وأن أعظم حرب في تاريخ مصر لا يصح أبدا أن تكون مجرد حرب عسكرية أعادت جزءاً من مصر وكفى، ودفنت معها أخلاقيات غالية مميزة للشعب المصري لتحل محلها اللامبالاة والسلبية وغياب الهدف والقدوة وحالة من التوهان، وشباب يختفي خلف الدخان الأزرق مكتفياً بجلسة علنية للشيشة على قهوة بلدي أو كافيه بالمعنى "المودرن"، وجلسة سرية مع أصدقائه ليضحك بهستيرية على لا شيء وهو يمسك بين أصابعه بسيجارة "محشية"..
المنطق يقول: إن مصر التي أنجبت آلاف الشباب الذين دافعوا عنها بدمائهم وأرواحهم تنجب الآخرين الذين يرفعون راياتها -ليس على جبهة القتال فقط ولكن- في الشوارع والمدارس والجامعات ومجالات العمل المختلف..
لكن صفر المونديال في كل مجالات حياتنا يجعل مصر مثل مدرسة النجاح التي لم ينجح فيها أحد.. ولن ينجح فيها أحد أبداً،
ونحن نعيش سنوات وباء الأخلاق الذي يشبه أنفلونزا الخنازير في سرعة العدوى به.

اوعى تكون سرحت أو نمت.. الحكاية مش قصة فيلم؛ لكن إحنا فعلا نحتاج الآن إلى حرب أخرى ليست مع إسرائيل؛ ولكن مع أخلاقياتنا المنهارة..
وكما قال يسري فودة: إننا "نحتاج دعوة إلى الحرب.. لكنها حرب من نوع مختلف يقع ميدانها في بيوتنا وشوارعنا وجامعاتنا وإعلامنا"؛ لسبب بسيط، وهو أن بعد حرب أكتوبر لم يمت الرجال فقط، ولم تترمل نساؤهم فقط؛
ولكن ماتت الحالة الأخلاقية والإنسانية التي صنعت الحرب.. لسبب بسيط آخر؛ لأن الذين حاربوا لم نزرعهم في صوبة منعزلة إلى حين بدء الحرب؛ ولكنهم ولدوا على أرض مصر كلٌ في بيئته، والتي صنعت منه وقت الشدة بطلاً في الميدان وبطلا في المدرسة والجامعة والمسجد والشارع.

ممكن تكون مختلف معانا وعندك وجهة نظر تانية، وتقول: إن مصر ليست بهذا السوء وأن تعبير الانهيار الأخلاقي ليس حقيقة؛ ولكنه من خيال مثقفين يعيشون في برج عاجي.. وأنه مازالت الأخلاقيات موجودة والحالة "زي الفل"، وأن شباب الآن أحسن ألف مرة من شباب أكتوبر 1973، أو تقول حتى: إن جملة "الرجالة ماتوا في 73" مجرد جملة للسخرية ليس إلا، أو ترى في نفسك أنه حين تحين الفرصة ستكون أفضل ممن رفع العلم فوق سيناء، وإذا جاءت الفرصة لن تتوانى عن كتابة "الله أكبر" بالدم على علم مصر..
لكن تذكر حينها أن الكلام أسهل بكثير من الفعل، وأن التضحية تحتاج إلى شخص آخر غير الذي يستمتع برائحة الحشيش والأفلام الإباحية على الموبيل..
"يعني الحكاية مش سهلة زي ما إنت فاهم"؛
وإلا ما كناش نمثل فيلم الهروب عند كل خناقة صغيرة في الشارع، أو نردد "وأنا مالي" مع وردة عند كل موقف يتطلب "وقفة رجالة".

يا ترى الرجالة ماتوا فعلا في 73 زي ما بنقول..
ولا دي مجرد جملة بنقولها للسخرية من نفسنا؟
وشباب مصر 2010 ممكن يعملوا بطولات زي شباب 1973؟
ولا زمن البطولات راح وإحنا في زمن الدنيا خربانة؟

عاوزه راي يا اماني بجد
الستات زمان كانو يستاهلو
انما دلوقتي البنت راسها براس الولد
وبتنادي بكل حاجه مثل دخول المراه الجيش
طب ازاي امراه في الجيش وبتاكل فران وتعالب وتقعد في الصحرا لوحدها في عز الليل والشمس
وبعدين تيجي في اتوبيس عام
تقول فين الشهامه
ده البنت بميت راجل
.......................
اما للرجال زي ما كل البنات مش عاوزين يدخلو الجيش وعارفين ان الراجل له مكانته وانو يستحمل عن الام ولما يقوم يسمع شكرا او دعوه جميله
طبعا فيه ولاد سيس "اسف ع اللفظ"
وفيه رجاله من ولاد الرجاله اللي كانو في 1973
ولسه شهامه الرجاله ورجوله الرجال في دمهم
بس انا لما الاقي بنت تحترميني هقوم لها بنت محترمه نفسها هقوملها
خناقه اعتقد اني مش هقدر افك الاشتباك يبقى متدخلش
موقف
كنت مره راكب مكروباص ميت غمر
بعد معاناه كبيره بسبب السواقين اللي بيمثلو انهم رجاله وبيحملو انسات فقط
المهم دخلت اول واحد وقعدت في الكرسي الاخير لوحدي ودخلت جوه
دخل بنتين وقعدو جنبي وعارفين ان العربيه بتحمل اربعات
المهم جه السواق قالهم العربيه اربعات
قالولو لا في ولد جنبنا
يعني عاوزين ايه مش فاهم
لا عاوزين ولد يجي جنبهم ولا ولد
لان كده كده فيه ولد ياي
ما علينا
ايه بقى الحل
ان الولد يغور في ستين داهيه ويجي بنتين مكانو
مش كده
ع العموم
مع ان دي قلت ذووووووووووووق
بس انا قلتلهم لا انا راجل واذكى منكم ولما لقيت انهم يعني الى حد ما كويسين ومش انتكه لا ده لانهم محترمين
قلت للسواق خلاص انا هشيل الرابع
وحاسبنا عليه كلنا

بس
وكل الكلام ده
من وجهه نظري الصغنطوطه
بس
صدقيني يا اماني ان يمكن الرجاله ماتو في تلاته وسبعين
ده تكريم للي ماتو
بس لسه في رجاله في 2010ولغايه متقوم الايام

لا والله الرجالة لسه موجودين
الحمد لله ان فى لسه رجالة فى الزمن ده

ahmed shosha
وشكرا عالموضوع

يمكن الوحشين كتير.....وهما اللى غالبين ع الصوره

بس اكيد وده بجد لسه فى رجاله واحسن من 73

كمان...

بجد بجد لما الواحد بيلاقى كتير وحشين

ويجى واحد ويبقى شهم وراجل بجد بيقول يااااااااااه

الدنيا لسه بخير.....

ويا جماعه الاصل والمعدن بتاع الانسان بيبان فى

الشده..والمواقف الجامده....

شكرا على التوبيك امانى واكيد فى رجااااالة كتير اووووى وجدعان اوى لسه موجودين

تفاتيفي قصدك علينا باين !!

جيش اه من غير فيران وتعالب .. كله إلا كدا

نتكلم جد شوية

محدش يقدر يقول إن مبقاش في رجالة

بجد في ناس محترمين جداً ..

بالرغم

إن في فئة كبيرة

في وقتنا ده

بيسقطوا البنطلون وبيلبسوا تيشيرتات بمبي وفوشيا وترتر ويربطوا شعرهم

بتوكة زي البنات وكأنهم بسكوته

يمكن علشان كدا مفهوم (الراجل) اتغير !!

بس

رغم كل حاجة .. الراجل اللي بجد يعتبر الأمان !

اها
الجيش فيه كل حاجه
والجمله الشهيره بتقول
ايه
الجيش بيقولك اتصرف
فيه رجاله وحشين اوي
بس لما يتقال الكلام ده قدام ولد محترم بجد بيدايق اوي وبيغير ع لفظ ولد
قولو عليهم شباب سيس
فانكي
اشخاص في التوهان
بس بلاش نديهم لقب رجاله

زمن الدنيا خربانه
الناس كلها ماشيه غلط وفاكرين انهم ماشين صح او مش فارقه معاهم
ويمكن انا واحد من الناس دي ويمكن بردوه كتير من الناس الي بتكتب كلام
جامد وجميل هما نفسهم الي بيعملو كل الي انت قولت عليه بس ياترى
الكلام ده هيأثر معاهم معتقدش لان دي بلد الكلام
نتكلم كتير نشتغل قليل وناخد علي دماغنا ونسكت
و الله اكيد الرجالة ماتو فى الحرب بس المشكلة مش فى كدة المشكلة ان
الشباب لو مصر هاتحارب هاتلاقى الشاب يقولك هى البلد عملتلى اية عشان
احارب ليها فدلوقتى ناس معاهم شهادة عاليا مش لاقيين شغل و الى معاه
هندسة او تجارة ممكن تلاقية سواق مكروباص
نشوف مشاكل البلد الاول
مبحبش الناس اللي بتعيش في الدور قوي وتقول الأخلاق والشهامه الرجاله
موجوده وفي كل حته بس كل الحكايه انهم معدوش زي الأول بقوا قله وده
راجع لحال مصر الوقت متلوموش علي الناس الناس اللى عنده مكفيه
مصر اللي انجبت رجاله 73 هي اللي انجبت الشباب اللي موجودين الوقت الاخلاق
هي نتيجه طبيعية للمجتمع اللي بنعيش فيه

رجال 2010 محششين يا كوكى
وماقصدش برجال 2010 الولاد بس وكمان البنات ضايعة يعنى
الرجالة اللى حاربت فى 73 مختلفه عن رجالة دلوقت كتير
والبنات والسيدات اللى كانوا واقفين ورا الرجالة دى فى الحرب بردو اتغيروا كتير
فيه ف المجتمع انهيار اخلاقى ودة واضح
فى لامبالاه وسلبية وانانية
والأنهيار دة موجود فى البنت والولد ع حد سؤاء

شكرا فهمى ع ردك واتمنى انك تكون فهمتنى @};-@};-

حمد لله احمد ان لسة فى منهم
لكن محتاجين انهم يكونوا اكتر من كدة وفعالين ف الحياة اكتر

انتى قولتيها بتقولى ياااااااااااااااااه لو شفتى حد كدة
ودة معناه انهم بدأوا ينقرضوا

فى رجالة محدش اعترض لكن اكيد مش زى زمان

شكرا ليك لولا ع مرورك وردك

والله يا وهم الولاد دة اكبر انهيار للمجتمع ومعاهم بنات فى نفس درجات الأنهيار
عندك حق فعلا يا وهم
الرجل اللى بجد امان فعلا
بس للأسف ضاع الأمان مننا
بس لو دورنا شويا اكيد هنلاقيه

العيال السيس دة كترت اوى
لكن العيال السيس مش فى شكل اللبس وبس
كمان اخلاقيا فى ضياع
ممكن تلاقى حد محترم جدا فى شكله لكن تصرفاته ..؟؟؟؟!!!
ودة ينطبق عليهم مبدا الرجالة ماتوا فى 73

تصدق يا شريف عجبنى ردك ورأيك
المجتمع والظروف الأقتصادية ممكن تأثر على اخلاقياتنا لكن لازم نقاومها نحافظ ع اخلاقنا وعادتنا وتقاليدنا
مش صح اننا نعلق كل حاجة على المجتمع
فى مشكلة فى النشأ نفسه من اول الأطفال

فهمتك
يمكن انا كنت شايف من وجه نظر مختلفه
لان اكيد مش مطلوب من بنت قاعده تقوم تقف لراجل تعبااااان

موضوعك حلو اوى يا امانى
وبيناقش حاجة فعلا موجودة

بس الحكاية مش بالظبط زى ما بتقولى ان الرجالة ماتوا فى 73
بالعكس فى رجالة زى بتوع 73 وفى أكتــر كمان
بس يمكن ظروف ان البلد كانت فى حرب كانت النفوس قوية
انما حاليا ما فيش حروب وعايشين فى سلام
فتلاقــى ان الراجالة من ناحية الحرب هاديين
بس اللى أكيد ان لما نعرف ان فى حاجة
هتلاقى رجالة 73 كلهم رجعوا من تانى

اه دلوقتى الشباب بقــى مش ولابد دلوقتى
كل واحد بقــى همه على اللى لابسه والللى فى جيبــه
واللى بيكلمها واللى معاه
وما بقاش فارق أى حاجــة

وفى ناس بتبقــى فى حالها
وما بتحاولش تتدخل فى اللى مالهاش فيه
تجنبا لأى صدمات
ناس عايشة كافية خيرها شرها مش محتاجة من الدنيا غير الستــر
وناس تانية الظروف الاقتصادية والمجتمع اللى عمل فيهم كدا

وزى مانتى يا امانى بتقولى مش لازم نعلق فشلنا على المجتمع
امال نعلقه على ايه
البطالة والجوع والعيش والكلام ده كله مين يتحاسب عليه
لما هو مافيش ناس بتشتغل وناس مقومــة البلد
امال البطالة دى جايــة منين
من يومين كان فى أزمة فى السولار بتاع العربيات
المواصلات وقفت بيا فى بلد جنب بلدنا حوالى ساعة الا تلت
نزلت أخدتها مشى والله العظيم
طيب والعجز ده جاى منين
والمواصلات واقفة وحال الناس واقف

انا مش عارف أقول ايه تانى
غير ان بجد الرجالة رجالة
ومش معنى ان ظاهرة الشباب السيس انتشرت اوى
يبقــى كل المجتمع كدا
جايز الرجالة مش بيظهروا فى كل المواقف
بس موجودين
شكرا مونـى

كده انا اعلق بقى بس ركزوا فى كلامى كويس
دلوقتى انتى لو راكبه اتوبيس بس شكلك محترم والناس حاسه انك مضايقه من المكان اللى واقفه فيه وكده سداينى ناس كتير هتقوملك انما بصراحه لو البنت مبسوطه وده احنا بنشوفه كتير يبقى حرام حد يعبرها
بالنسبه للمثال بتاعك للحامل يمكن حظها ان مفيش فعلا حد قاملها
وده بيبين ان فعلا الشهامه والرجوله قلت
الشباب كله دلوقتى حالته ضايعه سواء بنات او ولاد وكل ده من الثقافات الغربيه اللى احنا متمسكين بيها
وبعدين دلوقتى الدنيا مش زى زمان ممكن تروح تحوش عن حد فى خناقه انت تتحبس ويطلعوك انت المذنب فى الاخر
طب انا ليه اعرض نفسى لمشاكل من غير سبب
بصى يا امانى الرجاله موجوده طول عمرها بس كل زمان وله ادان
وشعار الشياطين دلوقتى بيقول يه
نحن نريدها هلس هلس .. نريد خرابا دائما
خمره وبانجو ورقص رقص.. هدفنا شبابا ضائعا

واحنا بقى شبابنا كله ضاع وحلمه برضه ضاع
يمكن انا مقلتش اللى جوايا كله ومش عارف اعبر عنه
بس اوعدك انى لو فى حاجه تانيه هدخل اقولها
شكرا يامونى على النقاش الممتع ده

لو واحد كبير في السن ليه لأ .. وحصلت يعني

إنما لو واحد تاني الأرض واسعة يقعد عليها أو عنده السلالم (*)
...................

أماني المشكلة إن كل واحد بيحمّل المجتمع إنهيار الأخلاق والقيم

طيب ومين السبب الأساسي في الإنهيار ده مش إنسان برضه ؟؟

كل واحد يبدأ بنفسه وبأهل بيته الأول .. وكل حاجة هتتعدل

.............

همس الليل

انما حاليا ما فيش حروب وعايشين فى سلام

مش متفقة معاك في الجزء ده .. إحنا عايشين في أصعب وقت

لا في سلام ولا أمان ولا إحترام ولا أخلاق .. بغض النظر عن اللي بيحصل في العالم

نشوف اللي بيحصل في بلدنا وإنت إتكلمت كتير في الجزئية دي

أقول حاجه كمان .. أنا بقيت بخاف أنزل من البيت !!!

..

ايوه انا فاهم قصدك يا حاج مصطفى
انا واحد من البنى ادمين بركب القطر وبروح الكولج بتاعتى فى اسماعليه
والقطر بيكون زحمه من الطلاب والناس بتروح شغلها وانا ساعات بفضل واقف بتاع محطتيين على واحد يقوم عشان اقعد مكانه
فطبعا مش هستنى لما يكون واحد لسه داخل القطر وانا واقف بقالى كام محطه ويقعد بس مش كل الناس انا لو واحد شايفه بصحته فطبعا مش بعبره
لو واحد بيبان عليه انه تعبان طبعا بقول مش مشكله يقعد وبقعده
وانا لو شايف بنت واقفه وسط اولاد ومش عارفه تعمل ايه
بروح ندهلها وبقعدها مكانى

بس بقى بيحصل العكس البنات ولا بيعبوا اى بنى ادم خالص
ساعات ما بيقعد لحد ما يقوموا

وهــم
والله الواحد ما عاد عارف مين السبب فى انهيار الأخلاق ومين مش السبب
وعلى فكرة لو جينا نفكر فى المجتمــع
هنلاقى ان المجتمع ده اللى هو بيتكون منى انا وانتى وغيرنا وغيرنا
يعنى المجتمع ده هو الانسان
واحنا اللى بنضر نفسنا
وناس بتشيل ذنب ناس
الناس كتيرة اوى تعبانين وشقيانين وفى حالهم
بس الدنيا اللى مش سايبة حد فى حالــه
وحكاية ان ناس تبدأ بنفسها عشان الدنيا تتعدل
فى ناس كتيرة يا وهــم بدأوا من زمان وبرضو مافيش فايدة



انا لما اتكلمت يا وهم على الحروب
أقصد حرب زى 73 و67 و 56
ما قصدتش الحروب المجتمعية
زى اللى تقصدى عليها
اللى انتى تقصديهده أصــلا طبقة فى المجتمع عاوزة الحرق
شباب ماعندهمش دم لا رحمـة
كل همهم اشبع الغرائز الزبالة اللى جواهم
سواء أولاد أو بنات
بيبقــى نقص عقل ودين
وهما دول بقــى الشباب السيس والزبالة اللى احنا بنتكلم عنهم
وهما دول اللى مسوئين شكل الشباب بصفــة عامة



والله الواحد ما عاد عارف العيب فى مين
لو كل واحد يراعــى ربنا فى اللى ادامه وفى نفسه
ولو كل اتقى الله فى اللى حواليه
والله ما هيحصل كدا أبــدا

والله يا أمانى انتى والأخوة اللى اتكلمو
لو احنا التزمنا بتعاليم الدين صح والله لنكون احسن ناس
نفسى الاقى كل الشباب متبعين الدين محترمين
بصراحة فى ناس عندنا فى الجامعة محترمين كتير
بس فعلا فى شباب تانية زبالة هما اللى اعطو انطباع مش كويس عن كل الشباب
ونفسى فعلا اثبت ان لسه فى رجالة بس مش عارف
يعنى انا لوحدى اللى هأغير الدنيا من يوم وليلة
لا طبعا بجد يا ريت الشباب يتقو ربنا واحنا نكون افضل جيل
شكرا

يا جماعة الرجولة مش مقتصرة علي الولد بس ... والبنت كمان ... ونقدر نعبر عن الرجولة باحترام النفس والشهامة وحاجات كتير زي كده

والحاجات ده بقت نادرة جدا عند الولاد والبنات برده .....

وبعدين انا كتير بركب اتوبيسات ولما يكون في حد واقف في شباب بيقفوا ويقعدوهم وانا باعمل كده احيانا

بس اللي بيضايقني هو وانا بركب سرفيس من المحطة للجامعة .... بتكون في سرفيسات كتير اوي وتيجي الواحدة تركب السرفيس واقفة وممكن تركب في اللي بعده وبسهولة ....فبضايق انا اوي من اللي بيعمل كده وباحلف علي نفسي ماقوملها وتتحمل بقي علي نفسها ....

وفي نظري في رجالة احسن من الاول كمان بس مش كتير

تصدق يا عم محمد انا كنت مرة راكبة اتوبيس علشان اروح طنطا للدكتور وراكبة الاتوبيس مش طايقة نفسى ولا طايقة حد وسبحان الله مكنش الا فى كرسى واحد واكيد هسيب لماما وانا واقفة وكل اللى قاعدين شباب امامير يا سبحان الله ماسكين موبايلتهم وهاتك يا لعب زى ما يكونوا فى الحضانة انا حد يقومولى مفيش عرق الندالة كان ناقح اوى عليهم بصراحة مع انى لابسه محترم الجاكيت اللى كنت لبساه بعد الركبة والطرحة عادية والبنطلون واسع ومش طايقة نفسى فعلا .
واتكرر معايا الموقف ده كتير كالعادة لكن فى مرة كنت راجعة مرة من عند الدكتور بالليل وكان وشى وارم من ضرس العصب وبردوه محدش قاملى وسبحان الله اللى قاملى بعد كدة راجل تقريبا40 سنة او اكتر وتعبان هو كمان مع ان ممكن شاب كان ممكن يقوم بدل ما هو بيلعب فى موبايله
ولذلك باعتقد ان فعلا الرجاله ابتدوا يقلوا بس مش هيختفوا
كفاية وجود عم محمد امين وشريف ومعتز واحمد محمود والناس الحلوة ديه لسه فى امل وسيبقى الخير فى امة محمد عليه الصلاة والسلام للابد ان شاء الله@};-

كل وقت فى رجالة وناس تقدر تعمل اكتر من اللى عملوه اللى قبلهم ومعتقدش تساوى الولد بالبنت يمنع ان يكون فى رجالة