عاوز رايكوا فى الحكايه دى

السلام عليكم
بصراحه ياجماعه انا كان بقالى فتره معملتش موضوع فى الحوارات وكده
بس حسيت ان الموضوع ده بجد لازم اعمله لانه مش حاجه فيا انا بس
ولكن ده شباب جيلنا كله
الموضوع بكل بساطه ان انا بقيت فى حاله من الكسل والاسترخاء مكنتش وصلتلها قبل كده
يعنى مبقتشى عاوز اعمل اى حاجه مش عاوز اخرج مش عاوز اروح الجامعه مش عاوز ازاكر
مش بعمل حاجه غير انى قدام الجهاز او التليفزيون
المهم انا قلت يمكن انا بس اللى كده فبدات اسال اصحابى سواء على الفيس بوك
او فى الجامعه او على الياهو
المهم انى وصلت لنتيجه حوالى ان 85% مننا نفس حالتى كده كسلانين مش عاوزين يعملوا اى حاجه دماغهم مش عاوزين يشغلوها
لدرجه ان فى واحد بيقولى انا حاسس انى فى مرحله خمول عقلى يعنى مخى مبقتشى عاوز اشغله
المهم يعنى ان الحاله دى انا لاحظت انها منتشره فى جيلنا احنا من سن 18الى19 سنه انما اللى اقل من كده او اكبر من كده عايشين عادى جدا
فانا بس عاوز ارائكم وخصوصا العقول الناضجه اللى انا دايما بحب اسمع كلامهم
يعنى ايه رايكوا فى الحكايه دى ؟وانتو فعلا ملاحظنها ولا لا؟ وهى بتحصل فى جيلكوا انتو كمان يعنى فى مرحلتكم العمريه ولا حدثت ليكوا وانتو فى سننا؟
يعنى انا بمعنى اصح عاوز جميع الاراء يمكن نقدر نلاقى حل للحكايه دى
وخصوصا انى بجد مش بالف من عندى لا ده انا سالت فعلا فطلعتلى النتيجه اللى انا ذكرتها دى
فمش عارف بقى
المهم اللى عاوز يقول اى حاجه يقولها عشان نقدر نستفيد كلنا


amino2

اولا موضوع مهم جدا يا محمد تسلم عليه

على فكره كلامك كله صح

والنسبه كام 85 فيما ازيد

دا من وجه نظرى

لانى بردوا ملاحظ كدا

بس مش عارف ايه السبب ؟؟

شكرا على التوبيك الجميل يا محمد

هو موضوع فعلا مهم بس النسبة دى مش كبيرة اوى كدة
بص هو ممكن يكون سبب ان كل ايامك متشابهة
مابين شغل ومواصلات وكليات ونوم
مفيش جديد
او ريتم وايقاع الحياة بقى ممل ممكن يكون من الروتين اللى بقى موجود
بس صدقنى دى مرحلة وهتعدى
وع فكرة لما يكون عندك هدف معين عاوز توصله مش هتحس بكدة خالص
لان اغلب الشباب دلوقتى مفيش اهداف او حتى يطور من نفسه
يمكن انا مريت بالمرحلة دى بس لما بقيت نفسى كدة
حسيت انى هموت لكن الحمدلله حطيت هدف فى دماغى
ولازم اوصله ان شاء الله
------------------------------------------
وصدقنى اعمل جديد فى حياتك وسيبك من حاجات كتير تافهه
وبص لحاجات اهم وخلى حياتك اولويات
والولهم دينك ومستقبلك
وانت مش هتحس باى ملل فى حياتك خالص


((دى وجهة نظرى المتواضع ومحبتش اطول لان فى كلام كتير
بس ياريت يكون وصلك كلامى
ولو فى حاجة غلط قولى ؟)):-h:-h:-h

منتشرة بين الجميع يابنى
تقريبا دة فيروس انتشر فى الجو فجأة
انا شخصيا بكسل اتكلم بقيت بكسل افكر او حتى اركز

يمكن بسبب ان الحياة ثابتة مفيش حاجة جديدة نعملها ولو عاملنا حاجة جديدة بتكون بايخة
كمان عايشيين حالة من اليأس غير مسبوقة بصراحة

وزى ما قال محمود مفيش اهداف عايزين نوصلها
سايبين الحياة تاخدنا وتودينا زى ما هى عايزة

اكيد هرجع تانى لما افوق

مبدايا كده شكرا لمرورك الجميل ده يا احمد
هو فعلا زى مانتا قلت الموضوع مهم عشان كده انا طرحته
بالنسبه للسبب فاحنا عاملين التوبيك ده عشان نوصل للسبب انشاء الله هنوصله وهنقدر نتخطاه

بص ياحوده انت كلامك فعلا مترتب ومناقش القضيه صح ويمكن انت قلتلنا اسباب ممكن تكون هى السبب فى كده
وانا موافقك فيها بصراحه بس ما الكل اللى قبلنا كانوا نفس ايقاع الحياه ده ليه بقى متاثروش كده
اما فى حوار انى ببالغ فى النسبه فانا هسيبنى من كل اللى عملته بره وهناخد النسبه من التوبيك ده نفسه من الردود
شكرا لمروك ورايك الجميل ده ياحوده

والله يا امانى انا حسيت انك مكسله تكتبى ردك ده اصلا
لا بصى يامونى انتى بردك ده وضحتيلنا ان الكلام ده مش فى مرحلتنا اخنا بس لا ده شكله كمان واقع فى حياتكم
وفعلا انا معاكى ان الحياه مبقاش فيها جديد ولو عملنا جديد بيبقى بايخ وفعلا بالنسبه للياس اللى احنا فيه ده انا مش قادر افهم من ايه
المهم لما تفوقى كده انشاء الله حاولى تفكري لينا فى حلول يمكن نقدر نخرج من الحاله اللى كلنا فيها دى
ونورتى التوبيك ياجميل

توبيك مهم جدا
تسلم علية
بالنسبة لرئى انا
مفيش احلام مفيش طموحات
عيزين نوصلها
دة حتى كوباية المية بقيت بكسل اقوم اجبها لنفسى
يمكن علشان ايمنا زى بعض
وفى سبب مهم اوى لكدة
بعدنا عن ربنا
وعن دينا
بجد لو قربنا منو اكيد هنرتاح جدا
وان الايام دى ايام ضغط
مذكرة وامتحانات
وكل تفكيرك الامتحان هيبقى عامل ازاى
وانا هجيب تقدير اية
رئى مع احترامى للجميع
تقبل مرورى المتواضع

exactly u r right

فعلا يا محمد موجود اللى بتتكلم عندى
احيانا بيكون معايا بس بالنوم مش التليفزيون
او كمان تحس ان الواحد ممكن يضيع وقته فى الهوا ... بدون اى مبالاة لقيمة الوقت اللى راح
وبدون ندم حتى

تعرف ليه ؟؟

محمود قالك فوق عشان مفيش هدف
صح

لكن من نظرى ليها صياغة تانية

وهى
عدم وضوح الرؤية او الهدف
والتشتت الفكرى عندنا كشباب

وصل بينا من كتر حيرتنا .. اننا مهما نفكر ..مهما نعمل .. مهما نحاول
شايفينها سودة ومسدودة من كل اتجاه

معدش فى دافع
الدافع
اللى ممكن يحركنا لقدام

لو انا هعرف انى لما هدرس كويس
هلاقى وظيفة مناسبة تعيشنى مرتاح واعرف اكون بيت جميل وانا فى شبابى ده
واعرفى ادى بلدى دى وكمان ممكن ساعتها ازود العلم بحاجة جديدة

منا خلاص فكرى صافى

مش قلقان من حاجة

هذاكر وانا مستريح

لأن حياتى مرسومة

هعرف اتجوز بنت انا حبيتها

واعيش عيشة كويسة

وبحس انى فى بلدى مش غريب

واعرف افيد دينى بدون اى قيود

ليه دماغى هتشت منى
؟؟

ليه ساعتها ههرب م الواقع
بالنوم
او مع التليفزيون
او انى اقضى يومى بأى شكل لحد مايعدى
وبعدين ربنا يسترها

او اكون حد تقليدى

واموت من غير مايكون ليا بصمة فى حياتى ولا حياة اى حد ولا دينى




-----------------------------
يجى 400 حاجة دخلت فى بعضها

بس كل حاجة ليها علاقة ببعض


وعلى فكرة

بعدنا عن ربنا ليه أهم الاثر فى ده

مش هقول عشان تكون متدين
ولو ان دا اساس

عشان اللى فوق كله أساسه كم ونظام فاسد

وللأسف هو حد مننا بعد عن ربنا بردوو

فبنعاقب بذنوبنا من بنى جلدتنا زى ما بيقولوا



..............
طولت ..صح ؟؟
معلش بقى

بس ده احساس

وربنا يبعد عنا االاحساس بالضياع ده

فعلا انت بتقول كلام زى الفل
ودى حاجه بقت واقعيه فينا
والكسل ده بقى فينا بصفه مستمره
بنكون مستنيين حد يجيى يزوقنا عشان نتحرك من مكانا
وبرضو اذا كان على التفكير
ده كله واحد فينا بيعتمد على معاه هو اللى يفكرله وهو اللى يعمله اى حاجه
واللى فاقف معاك برضو نفس التفكير بيقول انت اللى هتفكرله وانت هتعمله الحاجه
وكله واحد فينا بقى فاكك من نفسه وفاكك من الحياه كلها
وبنكسل ننشط عقلنا ونثقفها على الاقل
وكل واحد فينا لما يشوف حاجه مهمه ولازم تقراها وهو لسه بيقراه فى اول سطر عقله بيقوله
انت لو قريت وكلمت بقيت القرايه هتستفيد ايه ولا حاجه

واذا كان على الخروج فالواحد بقيت هو الكرسى اللى بيقعد عليه قصاد الكمبيوتر واحد
الواحد بقى بيخرج عشان كليته وخلاص وكمان ايه بنخرج واحنا مفروض علينا غير كده بنكسل

بس كفايه كده يا امينو يا صغير
عشان انا تعبت ومكسل اكتب حاجات تانيه
سلاموا عليكوا

والله يابنوته انتى وجهه نظرك منطقيه برده ويمكن يكون تفكيرنا فى الامتحانات ده سبب ضمن لاسباب
وانتى برده زكرتى بعدنا عن ربنا وده سبب مقنع فعلا
يعنى بصراحه عجبنى تفاعلك مع الموضوع بشكل كوبس
وشكرا على مرورك الجميل ده يابنوته

والله يادكتور انت تقريبا فسرتها بس انا مش عارف برده
اصل انا ملاحظ ان فى اجماع على الحكايه دى وتقريبا كلنا بنقول نفس الاسباب
طب لما احنا عارفين الاسباب مش بنحلها ليه ولا برده مكسلين
ولا احنا عاجبنا الوضع كده مش عارف بصراحه
بس انت نورت التوبيك فعلا برايك الاكثر من رائع ده وعن نفسى حسيت انك قولت كل حاجه
شكرا لمروك يا د/ محمود

ههههههههههه
ماشى ياعم شريف روح نام شويه بقى عشان انت تعبت على ماكتبت الرد ده
المهم بجد كويس انك نبهتنا لحاجه مهمه كمان
ان كل واحد فينا بقى يعتمد على الثانى والثانى بيعتمد على الاولانى طب اما الاثنين يعتمدوا على بعض مين بقى اللى هيفكر
فابالتالى مفيش تفكير مفيش تقدم مفيش ازدهار مفيش مستوى اقتصادى عالى
يعنى العيب فينا احنا كشعب اننا مش عاوزين نفكر
ولا فى الحكومه ان هى عاوزه الشعب يبقى كده عشان تعمل فيه اللى هى عاوزاه
لا بجد واضح ان الموضوع ده محتاج وقفه لان احنا كشباب احنا المستقب فلما نبقى احنا فى سننا ده ومش عاوزين نعمل حاجه
طب اما نكبر هنعمل ايه بقى نرو نموت احسن
شكرا لمروك ياشريف بيه

والله فعلا دا حاصل معايا انا شخصيا دلوقتى ومع كل صحابى
وانتم كمان بتقولوا انه حاصل معاكوا
يبقى يا محمد النسبة الصح فعلا 85% : 90% من الشباب كدا
واللى يخليهم فى الخمول والكسل دا وعدم الابتكار
كل واحد بيعتمد على التانى
يعنى انت مثلا لو فى امتحان ومعاك واحد صاحبك شاطر
هتعتمد عليه ومش هتزاكر
هتقول انا هغش منه للى ينجحنى وخلاص
وتضيع وقتك فى اى حاجة فارغة
يعنى مثلا برده
انا كتير المفرض ازاكر على الجهاز
الاقى نفسى بسيب المزاكرة وافتح النت وادور على اى حاجة ملهاش دعوة بالمزاكرة
وانسى انى كنت المفروض قاعد اساسا علشان ازاكر
واللى يخلينا برده منفكرش معظمنا حاطط فى دماغه انه مفيش امل يوصل للهدف الى هو محدده
شكرا ياعم محمد على التوبيك الفلته دا
:-/:-/ :-o:-o:-o %-(%-(%-(%-(

والله ياعم حمود انت مش محتاج ترد اصلا لان انا عارف حاله الكسل اللى انت فيها من بدرى
بس تسدا الامتحانات قربت تبدا يالا اما ندور على حد دحيح بقى نقدر نغش منه عشان ننجح بقى
وفعلا مفيش هدف ياحوده
توبيك فالته ايه بس ياعم يابنى انا يوم مابقول ياتوبيك لازم انزل حاجه واقعيه عشان نقدر نستفيد مش كلام فاضى وخلاص
بصراحه يامحمود الموضوع كبير كبير يعنى ممكن متستوعبوش بحاله الكسل بتاعتك دى
نورت ياخويا

عندك حق والله
بالنسبة ليه عندى كسل فظيع ...خصوصا لما بنوى اذاكر
وبجد والله بحس انى مقصرة جداااااا
جايز عشان دى اول سنة بذاكر فيها لوحدى ...يعنى عشان اختى خلصت
فبقيت بذاكر لوحدى فى الاوضة
مش عارفه بقى الكسل ده نهايته ايه ...ربنا يستر
تسلم على التوبيك يا محمد

هو الكسل بصراحه نهايته مش حلوه لانه ممكن يوصل انك خلاص مش بتفكرى فى اى حاجه
بس انا ملاحظ ان كنا كده يعنى دى بجد مشكله
مش عارف والله يانوسه بس انا هحاول اجمع الافكار اللى الناس كلها قالت يمكن يبقى ده الحل
شكرا لمرورك الجميل ده ونورتى والله