ورقة مقصوصة من ورقة جرنال
و دا اللي كان مكتوب في الورقه
- - - - - - - - - - - -
عجبي عليك يا إبن آدم يا كبير الدار
قومت الدنيا و ما قعدت لما قالوا حمار
هو اسمي دا شتيمة ولا جنسي دا عار
خلقني ربي و خلقك ولا حدش له خيار
و انا مهما زاد الحمل فوقي صابر على المشوار
لا في يوم أقول إشمعنى أخويا و آخد منه تار
ولا يوم أبص لرزق غيري و أطق منه و أغار
ولا ارفع في يوم عيني على جارتي و اصون الجار
ولا مهر أدفع لحمارتي ولا شبكة و سوار
ولا شقة أجمع في تمنها و أجهز دار
ولا حرمي حامل تتوحم عايزة الكافيار
ولا بنت تخرج عن طوعي و تجيبلي العار
ولا ابن يدمن و يهلوس و يقع ينهار
عايش في حالي متهني و ليا أفكار
بآكل و أشرب و أنهق و مافيش أسرار
و عندي إبن آدم يخدمني ليل و نهار
إن جعت يشتري برسيمي بأغلى الأسعار
و إن مرضت يفضل يعالجني و يدعي الستار
خادم أمين من غير راتب ولا حتى إيجار
و دلوقتي عرفت يابن آدم __ مين فينا حمار ؟؟؟:)
