يلا نقرا القران صح

بالتوفيق يا بنوتة
و ربنا يجعله في ميزان حسناتك

انا موافقة ومعاكى فى الموضوع دة
يلا يا مفكوكين اوكازيووووون حسناااااااااااااات
جزاكى اللة كل خير

يلا يا بنوتة وانا معاكى لو احتجتى أى مساعدة انا بردو كنت دارسه أحكام التجويد

فكرة حلوة بجد
وربنا يعينا على تنفيذها

فكرة جميل بجد تسلم ايدك

ياريت ترجعي وتكملي ...

فكره رائعه ويارب تتم
وجزاكى الله كل خير

يلا يلا بسرعة انتي بتتعلمي من امته من ورايا؟

السلام عليكم ورحمه الله وبركاته

انا اسفه جدا بجد لانى اتاخرت عليكم بس ظروف والله

بس انشاء الله بازن الله هبدا اول درس النهارده

طبعا انا عاوزه اوصل المعلومه بسهوله وبساطه عشان

نتعلم مع بعض خطوه خطوه

هنبدا باننا نعرف التجويد معناه& غاياته& فضله &استمداده& حكمه

احنا اول حاجه عاوزين نعرف ايه معنى علم التجويد

علم التجويد له معنيين

&الاول لغه:وهو التحسين والبيان والايضاح

&التانى اصطلاحا:اى معناه عند علماء التجويد

تلاوه القران الكريم على حسب ما انزله الله سبحانه وتعالى على نبيه محمد باعطاء كل حرف حقه

ومايستحقه من مد واظهار وادغام وغيرها من الاحكام

طيب نيجى بقى لغاياته ايه هدفه:

يمكن القارىء من جوده القراءه &حسن الاداء وعصمه اللسان من اللحن لكى ينال رضا ربه ويتحقق

له السعاده بازن الله بقراءه القران

هتقولولى ايه الكلام الصعب ده

طيب يعنى ايه لحن

اللحن هو الخطا فى قراءه القران

وله نوعين لحن خفى ولحن جلى

طبعا ده له درس لوحده هنتكلم عنه باستفاضه

بس نبزه عن اللحن الجلى انه مثلا تنطق مستقيم & مستكيم وده غلط طبعا

نيجى بقى لفضل التجويد:

يعتبر التجويد من اجل العلوم واشرفها لتعلقه بكلام الله كما ان تعلمه له اهميه كبيره بانه بيعين

القارىء على تلاوه القران تلاوه صحيح

طيب هتقولولى طيب جه منين علم التجويد مستمد منين يعنى

هوه ماخوز من كيفيه قراءه النبى صلى الله عليه وسلم واصحابه والتابعين واتباعهم من المه

الاسلاميه

طيب ياترى ايه حكمه

هو فرض كفايه يعنى ايه فرض كفايه

يعنى انه علم التجويد كبير جدا احنا بنتعلم الاساسيات اللى بس نقرا بيها القران صح

اما مادام فيه علماء كبيره دارسه علم التجويد شامل بكل علومه

فاحنا معليناش زنب بازن الله

اما العمل به فهو فرض عين على كل مسلم ومسلمه

حيث قال الله تعالى"ورتل القران ترتيلا"

دى كده مقدمه عن علم التجويد وبازن الله نبدا بقى من بكره فى التقيل

ويارب اكون عرفت اوصل المعلومه

وياريت لو حد له اى تعقيب او عاوز يستفسر عن اى شىء قلته يقول

ويارب يتقبل منا@};-
-------------------------------------------------------------

درس جميل والله وانا مستنى بقيه الدرس
واستفيد منك
شكرا يا بنوته
ربنا يجازيكى كل خير

جزانا الله واياك وياريت اكون عرفت اوصل المعلومه

@};-السلام عليكم ورحمه الله وبركاته @};-

طبعا احنا كده عرفنا مقدمه عن احكام التجويد وهناخد النهارده اول درس فى التجويد

نبدا بقى كل واحد يجيب ورقه وقلم ويكتب الحروف الابجديه

:)واللى مش حافظهم اهم يسيدى ولا تتعب نفسك

أ ب ت ث ج ح خ د ذ ر ز س ش ص ض ط ظ ع غ ف ق ك ل

م ن ه و ى



تحاولوا تنطقوهم بس مش العاميه بالفصحى

يعنى كده الف باء تاء ثاء جيم (بتعطيشها) حاء(بفتح الفم عند نطقها) خاء دال ذال راء

زين سين شين صاد طاء ظاء عين غين فاء قاف كاف لام ميم نون هاء واو (بفتح

الفم عند نطقها يعنى منقلش wow بضم الشفتين لا) ياء

كده احنا نطقنا الحروف وكله تمام


نيجى بقى لانواع مخارج الحروف هما تلاته

1) الحروف اللثويه: اى تنطق من اللثه وهما تلات حروف

- ذ كما فى "يومئذ"

- ث كما فى "مثل"

- ظ كما فى "عظيم ولظى"

هتقولولى يعنى ايه لثويه يعنى مثلا واحنا بننطق الثاء بنقولها واللسان مابين السنان

مش ننطقها ساء يارب تكونوا فهمتونى

2) حروف التفخيم: وهما سبعه حروف تتمثل فى ثلاث كلمات (خص ضغط قظ)

هتقولولى يعنى ايه تفخيم يعنى تغليظ وتثمين الحرف


يعنى زى الصاد مش ننطقها ساد لا صاد

3) حروف الترقيق: اى تنحيف الحرف وتتمثل فى باقى الحروف الابجديه ماعدا حروف

التفخيم اللى هما خص ضغط قظ
-------------------------------------------------------
- فى حالات استثنائيه فى الترقيق وهما حرفين الراء واللام

1) حرف الراء: يمكن ان يرقق ويمكن ا ن يفخم

- مرقق:عندما يكون مكسور او عندما يكون ساكن وماقبله مكسور

- مفخم : عندما يكون مفتوح او مرفوع او ساكن وماقبله مفتوح او مرفوع


هتقولولى ايه اللخبطه دى مش فاهمين حاجه


بصوا حرف الراء ده من حروف الترقيق اصلا صح لانه مش فى خص ضغط قظ فلما نلاقيه

مرفوع او مفتوح نفخمه


غير كده نرققه على طول يارب تكون فهمتونى

2) حرف اللام: دائما مرقق ما عدا فى حا لة واحدة وهى لفظ الجلا لة والحالة الو حيدة اللى فيها لفظ

الجلاله مرقق اذا كان الحرف الذى قبل لفظ الجلاله مكسور

يعنى مثلا كما فى " دون الله" النون هنا مكسوره فلفظ الجلاله مرقق

وكما فى " من الله " النون هنا مفتوحه فلفظ الجلاله مفخم

بكده نكون خلصنا مخارج الحروف

فى حاجتين صغيرين اقولهم ونكون خلصناالدرس عشان مطولش عليكم

1) حروف التفخيم بتكون مفخمه باقل درجات التفخيم لما بتكون مكسوره كمافى " المتقين"

يعنى طبعا بنفخم القاف بس مش قوى


2) اذا كان لفظ الجلاله قبله تنوين بالضم يكون لفظ الجلاله مرقق


كده الدرس خلص الحمد لله

انتوا اكيد بتقولوا صعب قوى واحنا بنقرى قران نطبق الاحكام دى بس هيه بتجى بالتدريب وسماع

القران من شيخ بتفهموه


وفى فكره ممكن تحددوا كل يوم سوره ولو من السور الصغيره تقروها وتطبقوا فيها الاحكام اللى

بتخدوها وباءذن الله هتتعودوا عليها



بس ياريت اعرف هل بعرف افهمكم ولا محتاجين توضيح اكتر منى


يلا اشوفكم بكره فى الدرس التانى:-h

----------------------------------------------------------------------------------------

*&*السلام عليكم ورحمه الله وبركاته*&*

ايه ده مفيش حتى تشجيعايه واحده :(

لالا

على الاقل يكون بينا تواصل واعرف ان كنت بفهمكم ولا ايه

عمه

احنا هناخد النهارده الدرس التانى بس قبل مناخده هناخد تعريفين صغيرين وهما حق الحرف ومستحق الحرف

*حق الحرف:الصفات اللازمه والثابته التى لاتنفصل عن الحرف باحال من الحوال كالجهروالشده والاستعلاء

والاستيفال(التفخيم والترقيق)

*مستحق الحرف:الصفات العارضه التى تعرض للحرف احيانا وتفارقه احيانا اخرى كالتفخيم

والترقيق كتفخيم

الراء وترقيقها وتفخيم اللام وترقيقها

نبدا بقى فى الدرس التانى وهناخد فيه

*&*اللحن*&*

اول حاجه عاوزين نعرفها يعنى ايه لحن

تعريف اللحن:هو الخطأ والميل عن الصواب

وينقسم اللحن الى نوعين: لحن جلى ولحن خفى

احنا هناخد النهارده اللحن الجلى بس عشان ميحصلش لخبطه

ايه هوه اللحن الجلى

اللحن الجلى : اى الظاهر وهو خطأ يطرأعلى ألفاظ القران الكريم فيخل بعرف القراءه والمعنى

طيب ليه سميناه جلى عشان ظاهر فى المعرفه واشترك العلماء وغيرهم فى معرفته

واللحن الجلى ينقسم الى خمسه اقسام:

(1)تغيير حركه بحركه او حرف بحرف: زى ضم او كسر التاء اذا كانت مفتوحه كما فى

"انعمت عليهم" هنا التاء مفتوحه

------------------------------------------

(2)ابدال حرف بحرف اخر:مثل ابدال الطاء بالتاء وابدال الصاد بسين

اى ترك التفخيم فى حروفه كما فى "اصروا"

ابدال الذال ظاء كما فى "محذورا"

----------------------------------------------

(3)حذف حرف او زياده حرف:كما فى "ولا انتم عابدون" بحذف المد

-----------------------------------------

(4) تحريك السواكن او تسكين المتحرك: كما فى " قيل لكم ارجعوا" هنا الميم فى لكم عليها

ضمه اى لا يمكن تسكينها

---------------------------------------------

(5)رفع الهاء اونصبها او تحريك الدال بالضم : كما فى " الحمد لله" و "لم يلد"

نيجى بقى عشان نعرف حكم اللحن الجلى

حكمه: يحرم بالاجماع اذا تعمده القارىء وان كان ناسيا او جاهلا فلاحرمه عليه وان كان جاهلا

بالحكم واهمل التعليم فعليه اثم

بكده نكون خلصنا الدرس يارب اكون عرفت اوصل المعلومه

يلا اشوفكم فى الدرس التالت ان شاء الله:-h

*******

الصراحه انا معاكي يا بنوته ولو احتجتي اي حاجه انا معاكي والله معاكي

ازاى مفيش تشجيع انا معاكى على الخط
حتى كمان طريقه اسلوبك فى الشرح كويسه

شكرا بنوتة

انا متبعاكى

وكملى ياريت

لالالالالالالالالالا
استمرى يا بنوته طريقه الشرحه حلوه
وجزاكى الله كل خير

والله شكرا ليكم بجد على الرد ده

بس بجد انا عامله الموضوع ده عشان افيدكم

مش عشان حاجه تانيه

فمكنتش محتاجه غير تواصل يعنى يعرفنى ان الشرح كافى

وشكرا ليكم مره تانيه:)

السلام عليكم ورحمه الله وبركاته
--------------------------------------------------

احنا الدرس اللى فات اتكلمنا عن النوع الاول من اللحن

وهو اللحن الجلى

النهارده بقى ناخد النوع التانى من اللحن وهو

اللحن الخفى .......................يعنى ايه لحن خفى؟؟

*اللحن الخفى: اى ليس ظاهرا يعنى مش واضح وبينتج عن خلل بيطرا على الفاظ القران الكريم

فيخل بعرف القراءه دون المعنى كترك الاظهار فى المظهر والادغام فى المدغم وكسر الممدود ومد

المقصور وترك الغنه فيما ينبغى ان يغنى

*سبب تسميته خفيا: سمى خفيا لاختصاص علماء التجويد والقراءات فى معرفته دون غيرهم من

الناس العاديين

*حكمه: مكروه ومعيب عند اهل هذا العلم وقيل يحرم وذلكلانه يخل باللفظ ويؤدى لفساد رونقه

وذهاب طلاوته

احنا قلنا ان من اللحن الخفى حاجه اسمها قصر الممدود ومد المقصور

طيب دول معناهم ايه........................؟

قصر الممدود: يعنى بنقصر اللى لازم نمده زى مثلا "السماء" دى لازم تمد اربع او خمس او ست حركات

هتقولولى ازاى ......؟؟يعنى نعد على ادينا اربع او خمس او ست حركات زى كده نطقها"السمااااء"

مد المقصور:مثل "قال" دى تمد حركتين فقط يعنى مينفعش نمدها اربع او خمس او ست حركات

نيجى بقى لاقسام اللحن الخفى

(1)قسم يعرفه عامه القراء: مثل ترك الظهار فى المظهور والادغام فى المدغم وترك الترقيق والتفخيم وغير ذلك

مما هو مخالف لقواعد التجويد

(2)قسم يرفه مهره القراء: مثل تكرير الراء والمبالغه فى زمن الغنه او نقصان زمن الغنه او الزياده والنقصان فى

الممدود عن مقدارها

*&*يتحقق صون اللسان عن اللحن واتقان التجويد باربع امور*&*

(1)معرفه مخارج الحروف

(2)معرفه صفاه الحروف

كالكاف والتاء فى الهمس اذا كانوا ساكنين فقط
كما فى "اهلكنا" و "الفتح"

(3)معرفه ماينشا للحروف بسبب التراكيب من الاحكام

كالغنه

(4) رياضه اللسان وكثره التكرار

---------------------------------
بكده نكون خلصنا الدرس التالت لينا

ولو فى استفسار او عاوزين اى توضيح

انا تحت امركم طبعا

اشوفكم ان شاء الله فى الدرس الجاى:-h

فكرتك جامده جدا يا بنوته
و ربنا يجعلها فى ميزان حسناتك
و انا كمان ان شاء الله هتبعك من دلوقتى لانى لسه شيفه الموضوع

ده شىء يسعدنى جدا انك تستفيدى

وربنا يتقبل ان شاء الله

السلام عليكم ورحمه الله وبركاته

النهارده هناخد الدرس الرابع وهوه

**احكام النون الساكنه والتنوين**

*تعريف النون الساكنه: هى النون الخاليه من الحركه والثابته لفظا وخطا ووصلا ووقفل وتكون

فى الاسماء والافعال والحروف وتكون احيانا متوسطه كما فى " الانهار" واحيانا اخرى متطرفه

كما فى "امن "

----------------------------------

*تعريف التنوين : نون ساكنه زائده تلحق اخر الاسم لفظا ووصلا وتفارقه خطا

ووقفا كما فى "عملا" و" غفورا رحيما"

تكتب الكلمة التالية ( رسـولٌ ـ رسـولاً ـ رسـولٍ ) نفس الكلمة بحركاتها الثلاث .

وتقرأ كما يـلـي ( رسولُن ـ رسـولَن ـ رسـولِن ) في حالة الوصل .

أما في حالة الوقف ( رسـولْ ـ رسـولا ـ رسـولْ ) .

هناك ثلاث انواع من النون الساكنه:

(1) نون معراه

(2) نون عليها راس الحاء

(3) نون عليها السكون

يوجد اربع احكام :

(1)اظهار حلقى

(2) الادغام

(3)الاقلاب

(4) الاخفاء

----------------------------------------

(1) الاظهار الحلقى

---------------------------------------

اى حروفه تخرج من الحلق لذلك يسمى حلقى

*تعريفه لغه: البيان والايضاح

*تعريفه اصطلاحا : اى اخراج الحرف المظهر من مخرجه من غير غنه كامله

*حروفه: هما سته احرف الهمزه & الهاء & العين& الحاء & الغين& الخاء

ومن الامثله عليه:

ينْـأون ـ ومـنْ أعــرض ـ كــلٌ آمـــن ـ يــنْـــهـــون ـ أنْـــعــمــت ـ هــل مــنْ خــــالق ـ وانْــــحــر

اذا اتت الحروف السته بعد النون الساكنه او التنوين نقوم باظهارها

بكده نكون خلصنا الدرس

واشوفكم فى الدرس الجاى:-h

السلام عليكم ورحمه الله وبركاته

النهارده هناخد الدرس الخامس لينا

وهوه تكمله احكام النون الساكنه والتنوين

احنا خدنا اول حكم وهوه الاظهار الحلقى

تانى حكم بقى هوه (2) الادغام

*تعريفه لغه: الادخال اى ادخال الشىء فى الشىء

*تعريفه اصطلاحا: ادخال حرف ساكن فى حرف متحرك

فيصيران حرفا واحدا مشددا من جنس الحرف الثانى

*حروفه: سته احرف يتمثلوا فى كلمه ( يرملون )

*اقسامه : (1) ادغام بغنه ويتمثل فى حروف ينمو

سمي ناقصا لبقاء أثر النون المدغمة وهو الغنة ( هي صوت أغن يخرج من الأنف لا عمل للسان فيه )

أ. ( من يقول ، وجوه يومئذ ) : وتقرأ " مـــيّــقول ، وجــوهــيـّــومئذ " .

ب. ( من وال ، حسنة وقنا ) : وتقرأ " مـــوّال ، حسنــتِــوّقنا " .
ج. ( من مال ، صراط مستقيم ) : وتقرأ " مــمّــال ، صــراطِــمّستقيم " .

د. ( عن نفس ، يومئذ ناعمة ) : وتقرأ " عــنّــفس ، يومئذِنّـــاعمـة

(2) ادغام بدون غنه ويتمثل فى حرفى اللام والراء

سمي كاملا لعدم بقاء أي أثر للحرف المدغم

أ. ( ولم يكن له ، أندادا ليضلوا ) : وتقرأ " ولم يكــلّه ،

أنـدادَلّــيضلوا " .

ب. ( من ربهم ، لرؤوف رحيم ) : وتقرأ " مــرّبــهـــم ،

لرؤوفُــرّحــيم "

نيجى للحكم التالت وهوه الاقلاب

(3) الاقلاب

تعريفه لغه: اقلاب الشىء عن وجهه او تحويل الشىء عن وجهه

تعريفه اصطلاحا: قلب النون الساكنه او التنوين لحرف الميم

ساكنه مخفاه بغنه اذا جاءت قبل الباء

اى اذا جاءت قبل الباء تقلب

الأمثلة:

أ. أن بورك : وتقرأ " أمْ بورك"

ب. كل نفس بما كسبت رهينة : وتقرأ " كل نفسم بما "

*الاخفاء*

(4) الاخفاءرابع حكم هوه

تعريفه لغه : الستر

تعريفه اصطلاحا : النطق بالنون الساكنه على صفه بين الاظهار

والادغام خالى من التشديد مع بقاء الغنه فى الحرف الاول وتسمى

غنه الاخفاء الحقيقى

حروفه: باقى الحروف كما فى كلمه "سبعا شدادا"

الأمثلة :

1. من أمثلة النون الساكنة :

أ. في كلمة واحدة : ( منْذر _ انْشقت _ الإنْسان )

ب. في كلمتين : ( منْ ثقلت _ منْ جوع _ عنْ سبيل )

2. من أمثلة التنوين :

(صفاً صفا _ مطاعٍ ثم _ كتبٌ قيمة )


بكده نكون خلصنا الدرس

اشوفكم على خير فى الدرس الجاى باءذن الله:-h

شكرا يا بنوته على الدرسين
وربنا يجازيكى كل خير

ربنا يخليك وشكرا لاهتمامك

جزانا الله واياك من نفس الثواب باءذن الله@};-@};-

ولو مش فاهم اى حاجه اسال

ولو فى اى تعقيدات وانا مش موضحه انا موجوده:)

فكرة جميلة وجامدة

فعلا الاحكام سهله ونطقها سهل بس عاوز تركيز
انا كنت بحفظ القرأن وعارفها بحد
شكرا ليكى يابنوته