حجاب 2009

حجاب 2007



قناة عيش أيامك عيش لياليك الفضائية برنامج خللى شبابك يفرح بيك بناتى الحلوين



انتشر الايام دى الحجاب جدا جدا والحمد لله تقريبا كل البنات اتحجبو هنعمل جولة بين البنات علشان نعرف هما اتحجبو ليه



-انا اتحجبت علشان صاحبتى الانتيم اتحجبت وقالت لى هاخاصمك لو ما اتحجبتيش



-الحقيقة انا اتحجبت لان شعرى باظ من كتر السشوار قلت اغطيه



-باحب الحجاب جدا شكله بيدى احترام



-كتير كلمونى عن الحجاب انو حاجة كويسة وبتدى حسنات كتير



-مش عارفة ساعات باحس ان الولاد بيحبو المحجبة اكتر ويوم ما بيفكر يتجوز بيتجوز محجبة



سالنا البنات ايه هو الحجاب وكان الرد



-الايشارب -الايشارب الايشارب -الطرحة -الطرحة -الايشارب حوالى 80% كانت دى اجابتهم



-اللبس الحشمة يعنى المغطى



-الطرحة والتونيك او العباية



سالنا البنات ممكن تخلعى الحجاب تحت اى ظرف من الظروف



-يعنى اكيد لا بس فى الفرح اكيد طبعا هاقلعه 60%



-مش هاخبى عليكى فى بعض المناسبات باقلعه 20%



-لا طبعا مش ممكن ده يحصل 20%



معانا الحاجة منيرة المستنيرة فتاوى جاهزة وتفصيل وعلى كل لون يا……… اهلا بيكى يا حاجة



فى برنامجنا عاوزين نقول للبنات حاجة عن الحجاب والظاهرة اللى انتشرت دى ياترى سببها ايه



-طبعا هى ظاهرة جميلة ان البنات ترجع تانى تحتشم وده حلو لكن احب اوضح لهم شروط الحجاب



علشان يتحجبو صح



-اول شرط انو يكون ستايل وشيك



-تانى شرط انو يكون ماشى مع الموضة



-تالت شرط انو ما يحرمهاش من انها تعيش انوثتها وتبرز مفاتن جسمها



معانا تلفون سورى للمقاطعة ياحاجة



اهلا بيك استاذ محمد ايه اللى بتقولوه ده وبتبوظو بيه عقول البنات حرام عليكم اتقو الله



فى شرع ربنا لا لا يا استاذ محمد انا ما اسمحش كونتروووووووووووول ينقطع الاتصال



الحاجة:طبعا ده نموذج للفكر الارهابى المتطرف المنتشر الايام دى بس هنقول ايه



الحمد لله معظم بناتنا بخير وعايشين حياتهم بالرغم من كل ده نرجع بقى لشروط الحجاب



-رابع شرط انو يكون بيعجب الاولاد



-خامس شرط انو يكون فيه تهوية كويسة فى الصيف وبيدفى فى الشتاء



وبكده لو الحجاب استوفى الشروط دى يبقى حاجة لذيذة خالص شكرا ياحاجة ربنا يكتر من امثالك



معانا دلوقتى مدام شوشو شيك هتدينا آخر صيحات الموضة للمحجبات



طبعا دلوقتى بعد المحجبة ستايل والمحجبة مودرن السنة دى كان معانا موضة الحجاب على واحدة ونص



وقلنا اللى ماعندهاش حاجة محزقة من الوسط تلبس حزام على وسطها



والجديد معانا الحجاب السحرى



-واااااااااااااااااااو ايه بقى الحجاب السحرى -ده انها تلبس كارينا لون اللحم وتلبس عليها كل اللى نفسها فيه



-ستوماك-بادى حمالات-اى حاجة اى حاجة كان نفسها فيها



وبكده تعيش حياتها واللى يشوفها مايبقاش عارف ده لون بشرتها الطبيعى



واللا هى لابسة حاجة لون اللحم -وماتنساش تلبس الايشارب طبعا



-آه طبعا الايشارب علشان تبقى محجبة وبكده بناتى المحجبات تقدرو تعيشو حياتكم



وتخرجو وتتمتعو وتعيشو حياتكم تربطو الايشارب على راسكم تربطوه على وسطكم



المهم تعيشو حياتكم واوعو تسمعو كلام الارهابيين التكفيرين المتطرفين الوحشين.















ياريت تقولو رأيكو فى حجاب الايام دى

=)) =)) =)) =)) =)) =))



اسمحلي ... يخرب عقلك =)) =)) =))

ههههههههههههههههههههههههه ههههههههههههههههههههه يا باشا ولا يهمك دا انا اخوك الصغير حلاوه

ههههههههههههههههههههههههه ههههههه
تحفة تحفة
والله صدق الى قال هم يبكى وهم يضحك
شكرا احمد على الهم

اية يا احمد الموضوع دة
هو فعلا موضوع شائك جدا ومنتشر
ضيف بقى على اللى بتعمله بعض البنات المحجبات ( ع فكرة ف بنات منقبات كمان ) وحاجة سيكو سيكو خالص يعنى
حاجة تكسف والله

هههههههههه حلوه سيكو سيكو دى يا امانى نورتى التوبيك و ميرسى يا منتوسه على المرورو والرد

انا هاحكي عن حالي الحجاب هو الحجاب اللي شرعة الاسلام لنا طبعا ناهيك بقي عن التقاليع والبدع والحمد للة الدنيا بعدها بخير وفيها كتير ملتزمات والحمد للة وميرسي لك طبعا

طريقة سرد الفكره تحفه تحفه يعنى
تسلم يا حجازى وربنا يهدى

نورتى يا حنين و ربنا يحميكى و يحمى كل بنات المسلمين و يوفقك

ميرسى يا همسه على المرور و الرد

ممممممممممم الموضوع جامد وسبحان الله انه اسمه حجاب لانه بيحجب مفاتن الينت ده اولا وبيحجب عنها الضرر
والحجاب المفروض على البنت هو الجحاب الشرعي ومتهيالي كل البنات عارفاه بغض النظر عن الطريقة او الشكل المهم انه لا يشف ولا يصف
انما بالنسبة للبادي فده فعلا نقمة جامدة جدا علينا ربنا يرحمنا من النار كلنا
عموما معظمنا دلوقتي محترمين والحمد لله

ميرسى يا مينى على رايك و على المرورو الرد