كل سنة و انتم.......
كل سنة وأنتو راضيين وصاغرين ومستسلمين وشاربين ونايمين وواكلين ومبسوطين ومأنتخين ومتفرجين ومتفائلين
كل سنة وانتم بتتكلموا في المدارس بعد العيد ولا قبله؟! والثانوية العامة هتبقي سنة واحدة ولا اثنين؟! والكادر الخاص حيطبق ولا لأ؟! وامتحان الكادر حرام وعيب ولا مكروه بس!! كل سنة وأنتم متكعبلين في دخول المدارس والمصاريف ولبس العيال، والاتفاق مع تاكسي يوديهم ويجيبهم كل سنة وأنتم منتظرين إن الوزير يقرر إن الدراسة هتبدأ بعد العيد، لأنها مش هتفرق خالص وكده كده العيال هتغيب الكام يوم دول علي بال رمضان ما ياخد لفته الزمنية ويبعد عن بداية الدراسة، كل سنة وأنتم طيبين وراضيين وقانعين ومقتنعين.
> كل سنة وأنتم بتعملوا جمعيات مترتبة علي قبضها في بداية رمضان أو في أول العيد والدراسة، كل سنة وأنتم عاملين قروض بفوايد بنكية مركبة علي خمس سنين كل سنة وميزانيتكم برضه ما هياش نافعة، كل سنة وأنتم طيبين ومبسوطين ومأنتخين ومقتنعين.
> كل سنة وأنتم بتسألوا علي سعر الحديد، وبتستغربوا من أحمد عز ومن أي عز تاني في الحزب الوطني، كل سنة وأنتم ما بتحقدوش علي أي واحد من أصحاب المال والجاه والسلطان، وكل اللي واكلينها والعة ومطفية وعلي كل لون يا أكل لأن حقدك وحده مش كفاية، المفروض تحقد وتنفسن وتشخصن لو عرفت كل سنة وأنتم طيبين ومؤدبين وحلوين ومقتنعين.
> كل سنة وأنتم بتتفرجوا علي يسرا وهي بتحارب عشان تجيب حق الغلابة!! باعتبارها جان دارك هذا الزمن، كل سنة وأنتم بتتفرجوا علي الست فيفي وهي بتشتم وتلابط وتتخانق مع كل اللي حظهم الأسود بيوقعهم معاها في مسلسل واحد كل سنة وأنتم تستنزفون ساعات عمركم أمام مسلسلات بلهاء عبارة عن تمثيل لا يقنع سوي المتخلفين والمغيبين الذين يصدقون أن هناك ملائكة تمشي علي الأرض وتركب عربيات آخر موديل وتلبس أحدث موضة وبالمرة تدافع عن الغلابة وينعل أبو المصداقية والمنطقية، كل سنة وأنتم طيبين وقاعدين متفرجين ومقتنعين.
> كل سنة وأنتم بتتصعبوا وتمصمصوا شفايفكم علي الضحايا بتوع السنة دي من قطار لعبارة للجبل اللي بيهزه الريح أمال يعني حتعملوا إيه غير كده!!
> كل سنة وأنتم تنتظرون دوركم في الكارثة الجديدة وينتظر الورثة الشقة بتاعة المحافظة وطولة البال إبقي قابلني لو بلغتك أي أمل كل سنة وأنتم طيبين وصاغرين ومستسلمين لقدركم ومقتنعين.
> كل سنة وأنتم تنتظرون تغييراً لا يحدث أبداً، كل سنة وأنتم تلعنون استقراراً لا يزول، وتحلمون بعالم جديد فتسمعون من يقول لكم إبقوا اتغطوا كويس كل سنة وأنتم طيبين وهاديين وعايشين وواكلين شاربين نايمين ومقتنعين.
> كل سنة وأنتم تكرهون إسرائيل ومن يحب إسرائيل ومن يبيع لإسرائيل كل سنة وأنتم تلعنون القطب الواحد وعالم القطب الواحد وأي عالم فيه بوش وليفني وكاديما ويديعوت احرونوت، كل سنة وأنتم تترحمون علي جمال عبد الناصر وعلي الأمة العربية التي خرجت ولم تعد كل سنة وأنتم طيبين ومسلمين أمركم لله ومتمنطقين ومقتنعين.
> كل سنة وأنتم تأملون في تداول السلطة.. الكروية في مصر وألا يظل الأهلي هو الفرعون الإله، الذي لا يمرض ولا يموت كل سنة وأنتم تجلسون وادعين هادئين منتظرين أن يمن الله علي الزمالك بالشفاء ليعود كما كان قطباً ثانياً قوياً عظيما كما عهدناه كل سنة وأنتم ونحن وكل محبي الجمال الأبيض نحلم بعودة الزمالك إلي منصة التتويج حتي نجرب التداول في أي مجال وعلي أي مستوي كل سنة وأنتم طيبين وقنوعين ومتفائلين ومقتنعين.
> كل سنة وأنتم صايمين رمضان وخاتمين القرآن ومصليين التراويح ومطلعين الزكاة «خمسة جنيه عن كل واحد» ومصليين العيد في الخلاء وفاطرين كل سنة وأنتم مندمجين تماماً في كل هذه الطقوس والشعائر ومكبرين الدماغ عن أي منغصات ومشاكل لأنها مش فارقة أقصد دماغك مش فارقة مع أي حد تكبرها ولا تصغرها أو حتي تقطعها خالص والله ماحتفرق مع أي حد لذلك ومن أجل كل هذا وتأسسيساً علي كل ما تقدم عيش عيش يا باشا وسيبني أعيش وكل سنة وانتم علي طول طيبين ومصدقين إنكم طيبين ويارب دايماً مقتنعين.
