حمار وجاله مزاج يستقيل من الشغل
نهق بحرقه وقال
ملعون أبو ده زل
من طلعة الشمس للمغرب على ده الحال
وقلة الأكل يا عربجى جابتلى داء السل
مش ماشى
مش ماشى وأضرب بقى ميت سنه لقدام
لا الضرب حيهمنى
ولا حتى شد اللجام
ونام ومدد على الاسفلت في الشارع وقال
يا عربجى حتى ولا الأعدام
مش ماشى
وان كان على شغلتك
أنا مستقيل منها
وأن كان على لقمتك
الله الغنى عنها
وأن كان على البردعه ولا اللجام
خدهم وأدينى حريتى
جه وقت أعلانها
مش ماشى
طول عمرى بجرى على مراتك وست عيال
لا يوم عصيتك ولا قلت أنى مش شغال
بجرى عليهم وعامل حضرتك راجل
وأنت أصيل في الدناوه
ما تبطل أستغلال
أيه شغلتك حضرتك ممكن تفهمنى
غير بس قولة شى حا وأنك بتشتمنى
وكل خطوه تفرقع كرباجين قدام
دا انا لحم يا عربجى والضرب يألمنى
مش ماشى
مش ماشى
من السوق للوكاله بسحب على شرنوب
وتنام تشخر حضرتك وانا صبرى غلب أيوب
واليل وبرد الشتا وشخيرك
خلونى حاسس كأنى ماشى بالمقلوب
مش ماشى
مش ماشى
تيجى تحاسبنى وأحاسبك يا ضلالى يا دون
وأقطع دراعى وأرهنك ح تلاقيك مديون
جدك شرانى بنص جنيه سنة عشرين
وأبوك ورثنى وكان راجل فظيع مجنون
أبوك هرى ضهرى بالضرب بالنبوت
ومن عرق جتتى بنالكو ست بيوت
جيت أنته ورثتنى وطلعت أيمانى
وأديك ح تسيبنى لأبنك بعد أنت ما تموت
مش ماشى
مش ماشى
أنا عايز ألف وأزوم وأرقص بحريه
لا حاه ولا شى
وأكلب مزاجى واللى نفسى فيه
وأرمى اللجام واقطعه دنا ما اتولدتش بيه
صدقنى يا عربجى
لو يوم بقيت أنا عربجى وأنت أتقلبت حمار
ح تعيش معايه معيشه بحبحه وهزار
ونقسم الشغل والمعلوم
بينى وبينك بالحق والمعلوم
مشوار تجر أنته وأنا مشوار
مش ماشى يا عربجى
مش ماشى والله العظيم منا ماشى
أنا من شغلتك دى مستقيل
أنا من شغلتك دى مستقيل
منقول
