اذا لم يعمل مع هذا الفيديو فانت تحتاج الى Adobe Flash Player
حمل أحدث نسخة من هنا
http://get.adobe.com/flashplayer/
"كلب الست"
في الزمالك من سنين وف حما النيل القديــــم
قصر من عصر اليمين ملك واحده من الحريم
صيتها اكتر من الادان
يسمعوه المسلمين والتتر والتركمان والهنود والمنبوذين
ست فاقت على الرجال في المقام والاحترام
صيت وشهره وتل مال يعني في غايه التمام
قصرو يعني هيا كلمه
ليها كلمه في الحكومه
بس ربك لجل حكمه قام حرمها من الامومه
والامومه طبع ثابت جوه حوا من زمان
تعمل ايه الست جابت فوكس رومي وله ودان
فوكس ده عوبال املتك عندو دسته خدامين
يعني مش موجود في عيلتك سخص زيو يا اسماعين
واسماعين ده يبقى واحد من الجماعه التعبانين
اللي داخو في المعاهد والمدارس من سنين
حب يعمل واد فقاقه ويمشي حبه في الزمالك
والقيامه والفتاكه يرمو طبعا ع المهالك
عم سمعه من قيامتو حب يعمل فيها فله
بعد مقلوظ بجامتو اشترى حته مجله
قول مشي بيقرا في حكايه من حكايات الغرام
واندماجو في القرايه خلى مشيو مش تمام
عاليمين يحدف بعيــــد ويروح شمال
لمحو فوكس من الحديد
قال ده صيد سهل "بوسه " وحلال
هوب
نط في كرشو دغري
جاب بجيامتو لحد ديلها
اسماعين بدال ما يجري قال يا رجلي
رجلي مالها
بص شاف الدم سايح من عاليها ومن واطيها
وياللي جاي ويا اللي رايح المجله مش لاقيها
حبه واتلمو الظنايا اللي هما البوابين
والحكايه والروايه قالهم "ده كلب مين ؟؟"
كلب مين ما كلبمنش سمعه زود حبتين
قالو واحد فيهم "امشي اللي جابك عندو مين "
قال ده شارع يا مواشي للي راكب واللي ماشي
كلمه من ده وكلمه من ده ظاطو
واترسمت فضيحه قول نهايتو والقصد من ده اسماعين اكل الطريحه
راحو اسم الشرطه طبعا والنيابه كفيله بيهم
واترمو في الحجز جمعا لما يجي الدور عليهم
حبه والشويش امين قال سعيد النقشبندي
قام غريب عم اسماعين قالو "محسوبك يا فندي"
قام سي سمعه يروح معاه الشوايش قال غور بدمك
راح تعصني وفوق قفاه كف طرقع داهيه في امك
تفتكر يفضل سي سمعه قد ايه في القسم نايم
استضافه الحجز جمعه
يا بلاش آدي العزايم
شاف بلاوي متتحكيش من الجماعه المسجنونين
قال يا عالم يا شاويش يا نيابه يا مسئولين
خلصوه بعد المناهده جثه من جحر الديابه
هيا حسبه ساعه واحده
كان في مكتب النيابه قالو مالك يا اسماعين
قالو زي البومب مالي
قالو عضك فوكس فين
قالو سبني اروح لحالي
انته شوف "سي فوكس " يمكن خد تسمم غصب عني
الوكيل قال برضو ممكن
والشاويش قاعد يغني
هيص يا كلب الست هيص
لك مقامك في البوليص
بكره تتولى في وزاره للكلاب ياخدوك رئيس
