قصيدة مش باقى منى

**Beauty** · 06-08-2009 04:40 AM

قصيدة مش باقي منى
للشاعر جمال بخيت

مش باقي منى غير شوية ضى فى عنيا
إنا حدهملك وامشى بصبرى فى الملكوت
يمكن فى نورهم تلمحى خطوة تفرق معاكى بين الحياة والموت
مش باقى منى غير شوية نبض في عروقى
خدى وعيشى
وافتح لى تابوت افرح بريحه ورد فرعونى وربنا فى عونى
إذا دخلت الجنة ولا النار حشتاق لضحكتك وقعدتى فى الدار
والقهوة متحوجه من طيبة العطار
فى كل يوم الصبح اشرب حليب قبطى
وفى النهار والمسا امسك ستار الكعبة لو سبتى
واثبت اذا هربتى
اهديكى عمرى وحسى وجوارحى
اهديكى جرحى هو إلى باقى فى دنيتى لما خلص فرحى
مش باقى منى غير شوية لحم فى كتافى
بلاش يتبعثروا فى البحر
بلاش يتحرقوا فى قطر الصعيد فى العيد
بلاش لكلب الصيد تنوليهم
خدى إلى باقى من الأمل فيهم
وابنيلى من عظمهم في كل حارة مقام
وزورينى مرة وحيده لو كل ألفين عام
الم الجراح يتلم
مش باقى منى غير شوية دم
متلوثين بالهم مرين وفيهم سم
كانوا زمان شربات والنكتة سكرهم
شربتهم الخفافيش في الب أوكرهم
مش باقى منى غير شوية دم
مقدرش اسقيكى مواجعهم
ويرضوا مقدرش ارميكى وأبعهم
يمكن في مرة تعوز تطلبينى شهيد
حاحتاج يوميها الدم يمضى على شهدتى
مش باقى منى غير شوية قوة في إرادتى
على شوية شعر من خطى
حسبى عليهم وأنت بتخطى
وأنت في صبح الدلال بتعطرى شطى
مش باقى غير شوية ضى فى عنيا
انأ مش عاوزهم
لو كنت يوم حالمحك وأنت بتوطى
في معركة مفيهاش ولا طيارات ولا جيش
وأنت فى طابور العيش
بتبوسى أيد الزمن ينولك لقمة من حقك المشروع
مش باقى منى غير شهقة
شهقة فى نفس مقطوع
بفتح لها سكة ما بين رئة وضلوع
ما بين غبار ودموع
وأنا تحت حجر المقطم في الدويئة بموت
أنا والعطش والجوع
يئن تحتى التراب
وأنا صوتى مش مسموع
يا حلمنا الموجوع من المرور ممنوع
مستنى لما يمر موكب سلاطينك
مش باقى منى غير شوية رحمة من طينك
على شوية صبر من دينك
مش باقى منى غير حبة غنى تايهين
فى الضلمة مش لاقين حس الفواعلية
ولا صوت مركبى عفى فوق المعدية
ولا صوت بناتى العذارى في كل صبحيه
والغنوه أمنية يما نفسى أقابل حبيبى
وأنا على الزراعية صوتك وصوتهم غاب
وأنا تحت حجر المقطم بموت لوحدية
الليلية راحت عيونى تطل على البستان
وجناين الرمان رجعت لى توصف عناد الغل والدخان
وسحابة سوده تضلل على غُنى الغلبان
رجعت لى توصف هبوب الموت على الألوان
رجعت لى توصف خيال الزُل في موائد الرحمن
مش باقى منى غير شوية كفر بشروقك
وأنا منبع الإيمان
مش باقى منى غير شوية ضى وعنيا
مش قادرة تلمحك
في وحدتى محنى
خايف أموت من الخوف والضعف يفضحنى
السجن عشش فى قلبى وماشى فى شوارعك
نفس إلى بعنى وخدعنى بالرخيص بيعك
أشيل حمولى أنا ولا أشيل حملك
ماعدت املك شىء فيكى ولا فيا
ولا قيراط ولا بيت
ولا نسمة صافية تلاغى النيل بحريه
مش باقي منى غير شوية حب جرحنى
ولا باقى منى غير شوية ضى فى عنيا

**..●●**آه...لو**●●..** · 13-08-2009 06:28 PM

ياااااااااااااااااااااااا اااااااه يا ياسو عالقصيده دي
عالم بحالو كلام ملوش حل
واحساس
وموسيقى الموال وانا بقرا الشعر ده وصوره الفيلم ونهايته
بجد شكرا ليكي

**Beauty** · 15-08-2009 01:14 AM

امال لو سمعتها من جمال بخيت تحفه بجد
ميرسى اوى اوى يا تفتيفى على مرورك الجميل وردك الاجمل
وانا مبسوطه اوى انها عجبتك

**..●●**آه...لو**●●..** · 17-08-2009 05:29 PM

شكرا ليكي يا عسل بس انا بصراحه مش سمعتها من جمال بخيت
ابقي ارفعيها او حطي اللينك بتاعها
في الموضوع وانا ابقى اسمعها
اصل انا بحب الحاجات دي
وشكرا ع ذوقك