موآجـهـة .. بـيـن آدم × حوآء

**ali_202000** · 19-10-2009 11:37 PM

مساء الاسئله الجامده يلا ياحواء رودى بكل صراحه

لو تزوجتي أدم يعشق كلمة لالالالا ماذا ستفعلين ؟
الرومانسية والكرم ايهما تفضلينها بأدم شريك حياتك ؟
ماهو تصرفك لأدم الذي تحبيه ولاتفهميه ؟

**روعة القمر** · 20-10-2009 01:05 AM

1- بصراااااااحه :

أكييييد رح أحس بطفش قليل ، بس مهما كان رح أحاول أفهّمه بالتي هي أحسن وان الدنيا مرح تستمر على حال وحده يعني اذا اليوم أحتاجه فاحتمال غدآ هو يحتاجني ، وأكيييييييد وبإذن الله انه رح يفهمني وبالتالي مرح يرفض كل الطلبات .

2- مافهمت عشان كذا بأعتذر وأترك الجواب لحواء غيري ههههه

3- مع الأيام وشوي شوي ورح أفهمه ، أو انه بيحس اني ماأفهمه ورح يحاول يوضح كلآمه وتعاملآته بشكل أفضل ^_^

والله أعلم

**بسمة امل** · 20-10-2009 01:44 AM

شكرااااا يارورو لمشاركتك معنا

واجاوب على اسئلة على:

لو تزوجتي أدم يعشق كلمة لالالالا ماذا ستفعلين ؟

حخلعة علطوووووووول ههههه
للاسف انى مابحب الرفض المطلق بدون حوار اكتر حاجة بتخنقنى
اقنعنى ونتفاهم وحنفذ طلباتك لكن سى السيد نووووو
وطبعا كتير بنضطر ننفذ لكن مش طول الوقت يبقى خنقة فعلا.

الرومانسية والكرم ايهما تفضلينها بأدم شريك حياتك ؟

لو ادم كريم يبقى لازم يكون رومانسى لان البخيل فى اموالة بخيل فى مشاعرة كمان يبقى صعب نلاقى واحد رومانسى وبخيل
ولو وجد لن اتنازل عن الرومانسية والكرم طمع بقى ههههه.

ماهو تصرفك لأدم الذي تحبيه ولاتفهميه ؟

صعب نحب شخص بدون ان نفهمة طيب حبناة على اى اساس واحيانا هناك اشياء فى ادم بتكون غامضة فلا داعى ان نتعب لمحاولة فهمها.

وشكرا ياعلى يانائب المدير لاسئلتك المميزة جداااااا

وفى انتظار باقى بنات حوا للاجابة.

**noha** · 20-10-2009 03:33 AM

الاول مبروووووووووووك ياسيادة نائب المدير ده ايه الهنا ده اللي احنا فيه
السئله بقى

-لو تزوجتي أدم يعشق كلمة لالالالا ماذا ستفعلين ؟
تزوجته يعني هو جوزي يعني خلاص هعمل ايه يعني هحاول ادلع عليه شويه علشان يقول ايون بدل لا:ب::ههه:

الرومانسية والكرم ايهما تفضلينها بأدم شريك حياتك ؟
نفس رد دندن بالظيط

ماهو تصرفك لأدم الذي تحبيه ولاتفهميه ؟
احبه وزوجي ولا افهمه هحاول افهمه هعمل فيها عبيطه:بخ:
واحاول افهمه وبعدين المفروض اني بحبه يعني لازم افهمه ولا ايه:coo:

**كوكى** · 20-10-2009 03:28 PM

لو تزوجتي أدم يعشق كلمة لالالالا ماذا ستفعلين ؟
بص يا على كلمة لا بدون تفسير للمرأة مستفزة جدا يعنى ايه لأ من غير تفسير واضح ومقنع بحس ساعتها ان الست دى بتعامل على انها حتة موبيليا فى البيت عليها تنفذ بس من غير تفاهم
وفى معظم الحالات حواء يتعند عشان الممنوع مرغوب انما بالحب والتفاهم ممكن الرجل ياخد عنيها كمان مش طاعتها ليه بس
فى الحالة دى اذا بقى الوضع على ما هو عليه طبعا هاطلب الانفصال فورا
الرومانسية والكرم ايهما تفضلينها بأدم شريك حياتك ؟
بص يا لول الراجل الرومانسى اكيد هايكون كريم فى مشاعرة فعمرة ما هيبقى بخيل فى الفلوس والعكس زى ما قالت بسمة الراجل الكريم فى الفلوس يبقى كريم فى مشاعره فالرومانسية والكرم متلازمين بس برضع ممكن يبقى فيه راجل كريم ومش رومانسى طبعه كده او مش اتربى على الرومانسية لكن مستحيل يبقى فيه راجل رومانسة وبخيل وده رايي
ماهو تصرفك لأدم الذي تحبيه ولاتفهميه ؟
مستحيل اكون بحب واحد ومش فاهماه لاان اللى بيحب بجد بيكون حب قوى عن طريق فهمه للطرف الاخر يعنى لو مش فاهماه مستحيل اكون باحبه ممكن اكون معجبة بشكلة او استايله او اى حاجة خارجية لكن الحب بييجى بعد الانسان مايفهم التانى عشان يبقى فعلا بيحبه

شكرا ليك يا على على اسئلتك ويارب تكون اجاباتى خفيفة عليكو

**بسمة امل** · 24-10-2009 03:04 AM

سؤالى لادم:

لماذا تحلل لك اشياء وتحرمها على حواء التى تخصك سواء اختك او بنتك او زوجتك؟

لماذا يسمح لك ان تغضب وتتحملك حواء وتغفرلك وتراضيك وليس العكس؟

لماذا تحب ان تأخذ اكتر مما تعطى؟هل طبيعة خلقها الله فى ادم؟ام ماذا؟

وشكرااااااااااا .

The Dark Knight · 26-10-2009 01:11 AM

أولا
التوبيك اكثر من رائع
بكل معاني الكلمة
الحوار مدار بشكل راقي جدا جدا جدا
اهنئك يا بسمة امل على التوبيك الجميل ده
و انا شغلت اختام المواضيع مخصوص ليه
عشان يكون اول توبيك مختوم بختم مميز لانه عجبني جدا
رغم ان اكيد في مواضيع كتير مميزة , بس في ناس عارفة ظروفي
و عارفة اسباب اني مش بعرف اشوف كل المواضيع

بعد ما قريت التوبيك كامل
انا جمعت الاسئلة اللي اتسألت للشباب
و هرد عليها دلوقتي
و ان شا ءالله هحاول اتابع كل التوبيك

اولا الحالات دي حالات فردية , لان زي ما حواء انواع , ادم كمان انواع
و في انواع في ادم مش متعصبة الا انها اقلية
انا شايف ان الراجل اللي متعصب في رأيه بتبقى حجته ضعيفة
و لانه مش بيقبل صفة الهزيمة , فتلاقيه بيستخدم منطق " خدوهم بالصوت "
فنقدر نقول ان سبب تعصب معظم الرجالة , هو عدم اعترافهم بمنطق الهزيمة
و لازم يحس ان هو الملك و صاحب القرار
و للاسف دول الاغلبية

اما بالنسبة لاسئلة نوها
اولا الراجل يحق ليه زواج اكتر من ست , و ده شرع ربنا
و يجوز في شوية حالات كده
اولا ان ممكن يكون في مشاكل في الخلفة
ثانيا يكون اصلا مفيش تفاهم بينه و بين حواء او مش مستريح معاها لاي سبب , اصلا حل الموضوع ده انه يطلقها , لكن لو في اطفال , بيفضل الزواج من اخرى
ثالثا لو معاه فلوس و خايف يقع في الغلط و زوجته مش كده يعني فبيتجوز مرة تانية و يكون معرف الزوجة الاولانية , الا ان برده الحالة دي مش بتحصل كتير و مش محبوبة , مهو لو معاه فلوس كان اتجوز الحلوة من الاول : )

ست كوكي
السؤال الاول : لاننا اتربينا بالشكل ده , ان الراجل يجوز ليه الخطأ بس الست لا
و بعدين في حاجة كده
و انا حاسسها مجنونة شوية

خاصة اني متكلمتش فيها قبل كده في حوار مفتوح
بالنسبة للعلاقة بين الراجل و الست
فان الراجل بيبقى مبسوط بالسعادة اللي بياخدها
انما الست بتبقى مبسوطة بالسعادة اللي بتديها
فاللوم بيبقى اكتر على حواء في حالة الخطأ , لانها مصدر السعادة في الطرفين

اتمنى مكونش خبطت في الكلام في النقطة دي

اما للسؤال الثاني : دي بتختلف حسب الراجل و العيلة و المجتمع اللي عايشين فيه
مش على طول
و مش كل الرجالة بنفس الشكل

نرجع لبسمة مرة تانية

بالنسبة لسؤالك الاول : زي ما لسه رادد على كوكي في سؤالها الاول

اما السؤال الثاني : نفس اجابة سؤالك بخصوص التعصب , لانه مش بيقبل منطق الهزيمة او ان الملك مينفعش يغلط

اما بالنسبة للسؤال الثالث :
الموضوع ده برده بيتغير من راجل لراجل تاني
بالعكس في بعض الرجال , بتبقى مبسوطة قوي لما تشوف شريكة حياته مبسوطة
يعني بينبسط باللي بيديه مش باللي بياخده
دي مش طبيعة خلقها ربنا في ادم
دي طبيعة ولدها المجتمع في ادم , انه اتعلم الاستهتار
فبقى بطبيعته انه ياخد اكتر ما يدي
الا زي ما قلت الحالات دي حالات الاغلبية و مش كل الرجالة زي بعضها

**ابو اسكندر** · 29-10-2009 10:37 PM

موضوع جميل اوى يا بسمة بس انا لسه صاحي من النوم اركز بس وابقى اشارك

**كيوبيد** · 31-10-2009 07:53 AM

انا بقى عندى سؤال وعايزة رده بصراحة من الشباب والبنات كمان
بصراحة هما كذا سؤال

اولا : ليه مطلوب من الست تغفر للراجل اى علاقة عابرة فى حياتة ومايبقاش عيب عليه ومعلش سامحية ولو حصل العكس مايغفرش ليها وتعتبر عار؟

التسامح مطلوب بين البشر عموما وليس بين الرجل والمرأة فقط...
وكما قال الشاعر..على قدر أهل العزم تأتي العزائم...
ويجب على المتزوجين عموما تفادي الوقوع في مثل هذا الموقف..لأنه وإن غفرت المرأة وسامحت ...فإنه يبقى في العلاقة شرخ لا يخفيه مرور الزمن

ثانيا: ليه لما الست تكون مريضة او عاقر او على الاقل اتاخرت فى الانجاب طبعا عادى لو الراجل سابها او اتجوز عليها لكن لما يكون هوه اللى مريض او مش بيخلف نبقى هيه قليلة الاصل ومش كويسة لو سابته؟

أنا مررت بتجارب مشابهة في أصدقائي وإلى الآن وماحدش ساب حد..وكله راضي بقضاء الله وبياخدوا بالأسباب...
يمكن بعض الموروثات والعادات زيّ اسم العيلة وتوارث اللقب...خاصةً لما يكون الزوج ولد وحيد

لماذا تحلل لك اشياء وتحرمها على حواء التى تخصك سواء اختك او بنتك او زوجتك؟

لا أحد يحرّم ويحلل الا الله عز وجل وليس من حق أحد..والذي يحلل لنفسه المحرّمات فهو انسان مريض والشيطان متحكم فيه...
واالي يحرّمها على غيره وهو محللها لنفسه... فهو الشيطان ذاته

لماذا يسمح لك ان تغضب وتتحملك حواء وتغفرلك وتراضيك وليس العكس؟

تقولي ايه بقى؟؟شوية دلع ويروحوا لحالهم وبكره يتمنّى ان زوج بنته يغفر لبته ويراضيها

لماذا تحب ان تأخذ اكتر مما تعطى؟هل طبيعة خلقها الله فى ادم؟ام ماذا؟

مش دايما والله ياست الكل...بس في أشياء بناخدها واحنا مش واخدين بالنا وحاسين ان احنا ملكات العطاء...
عموما العلاقة اللي فيها الأخد مش قد العطاء هي علاقة غير سويّة ولا تستمر..

تسلم ايدك ع الموضوع

The Dark Knight · 01-11-2009 11:16 AM

للاسف انا معنديش اسئلة كتير خاصة بحواء
بس عشان ننشط الموضوع
في كتير بيسألوا

هو ليه البنت لما بتكون عايزة حاجة تقعد تلف و تدور
و تلف و تدور
و تلف و تدور
تلف و تدور
و تلف و تدور
و تلف و تدور
تلف و تدور و تلف و تدور و تلف و تدور تلف و تدور و تلف و تدور و تلف و تدور تلف و تدور و تلف و تدور و تلف و تدور تلف و تدور و تلف و تدور و تلف و تدور تلف و تدور و تلف و تدور و تلف و تدور تلف و تدور و تلف و تدور و تلف و تدور تلف و تدور و تلف و تدور و تلف و تدور تلف و تدور و تلف و تدور و تلف و تدور تلف و تدور و تلف و تدور و تلف و تدور تلف و تدور و تلف و تدور و تلف و تدور تلف و تدور و تلف و تدور و تلف و تدور تلف و تدور و تلف و تدور و تلف و تدور تلف و تدور و تلف و تدور و تلف و تدورلحد ما تدوخنا معاها , من الاخر لحد ما توصلنا لمرحلة اننا نقولها اننا اللي عايزنها تعمل الحاجة دي
مش بتقول ليه دايركت انا عايزة كذا , رغم انها عارفة انه كده كده هيتم؟
هل هو دلع؟ هل هو قلة مخ ؟ هل هي عادة اتعودوا عليها ؟ و اللاه هو عشق للف و الدوران و التعلب فات فات و في ديله 85 لفة؟
اصل يمكن هي دي بس عقدتي مع حواء
انا بحب الحاجة تيجي دايركت حفاظا على الوقت و المجهود !!

السؤال منقول